ઉચ્ચ તાપમાનની આગાહી વચ્ચે ગાંધીનગર મ્યુનિસિપલ કોર્પોરેશને હીટ એક્શન પ્લાન 2026 અમલમાં મૂક્યો

ગાંધીનગર મહાનગરપાલિકાના આરોગ્ય વિભાગે હીટ એક્શન પ્લાન 2026 અમલમાં મૂક્યો છે. હવામાન વિભાગની આગાહી મુજબ 6 મે સુધી તાપમાન 41 થી 42 ડિગ્રી સેન્ટીગ્રેડની વચ્ચે રહેવાની સંભાવના હોવાથી સમગ્ર શહેરમાં યલો એલર્ટ જાહેર કરવામાં આવ્યું છે. તંત્ર દ્વારા નાગરિકોને તેમના સ્વાસ્થ્યનું ધ્યાન રાખવા અને ગરમીના ચિહ્નો દેખાય તો તબીબી સારવાર લેવા માટે ખાસ સૂચના આપવામાં આવી છે. આરોગ્ય વિભાગ તરફથી મળેલી વિગતો અનુસાર, 6 મે સુધી તાપમાનનો પારો 42 ડિગ્રી સુધી પહોંચી શકે છે. જ્યારે 4 મે અને 5 મે ના દિવસોમાં મહત્તમ તાપમાન 41 ડિગ્રી રહેવાની શક્યતા છે. આ સમયગાળા દરમિયાન ગરમીનું પ્રમાણ વધારે રહેતું હોવાથી લોકોને બપોરના સમયે કામ વગર ઘરની બહાર ન નીકળવા વિનંતી કરવામાં આવી છે. જો કોઈ વ્યક્તિને અચાનક માથું દુખે, પગની પિંડીઓમાં કળતર થાય કે શરીરનું તાપમાન વધવા લાગે, તો તેને હીટ સ્ટ્રોકના લક્ષણો માનવા. આ ઉપરાંત, ખૂબ તરસ લાગવી, પરસેવો ન થવો, પેશાબનું પ્રમાણ ઘટવું, ચામડી લાલ અને સૂકી થઈ જવી તેમજ ઉલટી, ચક્કર આવવા કે બેભાન થવું એ ગંભીર ચિહ્નો છે. આવી સ્થિતિમાં સમય બગાડ્યા વગર 108 હેલ્પલાઈનનો ઉપયોગ કરવો અથવા નજીકના સરકારી દવાખાનામાં સંપર્ક કરવો જોઈએ. મુંઝવણ કે ખેંચ આવવી એ પણ જીવલેણ બની શકે છે. ગરમીથી બચવા માટે સતત પાણી પીવું અને શરીરમાં પ્રવાહીનું સ્તર જાળવી રાખવું જરૂરી છે. આ માટે લીંબુ શરબત, મોળી છાશ, નાળિયેર પાણી અને ઓ.આર.એસ.નો ઉપયોગ હિતાવહ છે. બહાર નીકળતી વખતે હંમેશા સફેદ અને સુતરાઉ કપડાં પહેરવા તેમજ માથા પર છત્રી કે ટોપીનો ઉપયોગ કરવો. આ સિવાય, બહારનું ખુલ્લું ખાવાનું ટાળવું, લાંબા સમય સુધી ઉપવાસ ન કરવા અને ગરમીમાં ભારે શારીરિક શ્રમ જેવી પ્રવૃત્તિઓથી દૂર રહેવું.