ક્રિકેટ અને રાજકારણના દિગ્ગજોએ લખનઉમાં કુલદિપ યાદવના ભવ્ય લગ્ન સમારંભમાં હાજરી આપી

લખનઊઃચાઇનામૅન સ્પિનર તરીકે જાણીતા કુલદીપ યાદવ અને વંશિકા ચઢ્ઢાના ગયા અઠવાડિયે મસૂરીમાં ધામધૂમથી લગ્ન થયા ત્યાર બાદ લખનઊની હૉટેલ ધ સેન્ટ્રમમાં આયોજિત રિસેપ્શનમાં ક્રિકેટ અને રાજકીય ક્ષેત્રની અનેક મોટી હસ્તીઓએ હાજરી આપી. કુલ મળીને લગભગ 900 મહેમાનોને આ રિસેપ્શનમાં આવવાનું આમંત્રણ અપાયું હતું અને કેટલાક ખાસ મહેમાનો માટે ચાર ચાર્ટર પ્લેનની વ્યવસ્થા કરવામાં આવી હતી. મુખ્ય પ્રધાન યોગી આદિત્યનાથ તેમ જ નાયબ મુખ્ય પ્રધાન બ્રિજેશ પાઠક તથા કેશવ પ્રસાદ મોર્ય તેમ જ અખિલેશ યાદવને પણ આમંત્રણ આપવામાં આવ્યું હતું. યોગીએ કુલદીપ-વંશિકાને આશીર્વાદ આપ્યા હતા. અનેક ક્રિકેટરોને આ રિસેપ્શનમાં આવવાનું આમંત્રણ અપાયું હતું અને શરૂઆતમાં હેડ-કોચ ગૌતમ ગંભીર તથા યશસ્વી જયસ્વાલ હૉટેલમાં પહોંચી ગયા હતા. ભૂતપૂર્વ ઓપનિંગ બૅટ્સમૅન શિખર ધવન તેમ જ ઑલરાઉન્ડર રવીન્દ્ર જાડેજા પત્ની રિવાબા સાથે આ સમારોહમાં પહોંચ્યો હતો. આ ખેલાડીઓ હૉટેલમાં પહોંચ્યા કે તરત તેમના પર ફૂલોની વર્ષા કરવામાં આવી હતી વીવીઆઇપી મહેમાનો આવવાના હોવાથી હૉટેલમાં અગાઉથી જ સલામતીનો પાક્કો બંદોબસ્ત કરવામાં આવ્યો હતો. હૉટેલના પરિસરમાં બૉમ્બ સ્ક્વૉડ તથા ડૉગ સ્ક્વૉડ પણ ગોઠવવામાં આવી હતી. દરમ્યાન શનિવારે મસૂરીમાં લગ્ન બાદ કુલદીપ-વંશિકા કાનપુરના ઘરે પહોંચ્યા ત્યારે તેમનું ભવ્ય સ્વાગત કરવામાં આવ્યું હતું.