ખેલ મહાકુંભ 2025 અંતર્ગત રાજ્ય કક્ષાની કબડ્ડી સ્પર્ધાનું સમાપન થયું

દાંતીવાડામાં ખેલ મહાકુંભ અંતર્ગત કબડ્ડીની રાજ્ય કક્ષાની અંડર-14 અને અંડર-17 સ્પર્ધામાં રાજ્યની 16 ટીમોના 192 ખેલાડીઓએ ભાગ લીધો હતો. જેમાં અંડર-14 કેટેગરીમાં મહેસાણા, અંડર-17 કેટેગરીમાં ગાંધીનગર ગ્રામ્યએ પ્રથમ જ્યારે ગીર સોમનાથ અંડર-14 માં ત્રીજા સ્થાને જ્યારે અંડર-17 માં બીજા ક્રમે રહ્યું હતું. બનાસકાંઠા જિલ્લા રમત ગમત અધિકારી મહેશભાઈ પટેલે જણાવ્યું હતું કે,ખેલ મહાકુંભ 2025 અંતર્ગત બનાસકાંઠા જિલ્લામાં સરદાર કૃષિનગર યુનિવર્સિટી દાંતીવાડા ખાતે કબડ્ડીની રાજ્ય કક્ષાની અંડર-14 અને અંડર-17 ભાઈઓની સ્પર્ધાઓનું આયોજન કરવામાં આવ્યું હતું. આ સ્પર્ધામાં રાજ્યની 16 ટીમોના 192 ખેલાડીઓએ ભાગ લીધો હતો. અંડર-14 કેટેગરીમાં 8 ટીમોના 96 ખેલાડીઓ અને અંડર-17 કેટેગરીમાં પણ 8 ટીમોના 96 ખેલાડીઓએ પોતાની રમત રજૂ કરી હતી. મહા મુકાબલાઓ બાદ અંડર-14 કેટેગરીમાં મહેસાણા જિલ્લો ચેમ્પિયન બન્યો, જ્યારે ડાંગ જિલ્લાએ દ્વિતીય અને ગીર સોમનાથે ત્રીજું સ્થાન મેળવ્યું હતું. અને અંડર-17 કેટેગરીમાં ગાંધીનગર ગ્રામ્ય ટીમે પ્રથમ, ગીર સોમનાથે દ્વિતીય અને પંચમહાલે ત્રીજું સ્થાન મેળવ્યું હતું. ખેલાડીઓના ઉત્સાહ અને શિસ્તબદ્ધ રમતની દર્શકોએ પ્રશંસા કરી હતી.