ચીનના હાઇ-ટેક રસ્તાઓઃ જ્યાં AI અને રોબોટિક્સ વાસ્તવિકતાને મળે છે

બેઇજિંગ:ટેકનોલોજીની દુનિયામાં ચીન જે ગતિએ આગળ વધી રહ્યું છે તે જોઈને લાગે છે કે આપણે કોઈ સાયન્સ-ફિક્શન ફિલ્મ જોઈ રહ્યા છીએ. હાલમાં સોશિયલ મીડિયા પર ચીનના રસ્તાઓના કેટલાક એવા વીડિયો વાયરલ થયા છે જેને જોઈને લોકો કહી રહ્યા છે કે, "ચીન અત્યારે 2080માં જીવી રહ્યું છે." આ વીડિયોમાં કોઈ જાદુ નથી, પરંતુ હાઈ-ટેક આર્ટિફિશિયલ ઇન્ટેલિજન્સ (AI) અને રોબોટિક્સનો અદભૂત નમૂનો છે.વાયરલ વીડિયોમાં જોઈ શકાય છે કે જ્યારે કોઈ વ્યક્તિ પોતાની કાર પાસે પહોંચે છે, ત્યારે તેણે દરવાજો ખોલવા માટે હેન્ડલને અડવાની કે ચાવી કાઢવાની જરૂર પડતી નથી. કારના સેન્સર માલિકના હાથના ઇશારા (Gesture) ને ઓળખી લે છે અને દરવાજા આપમેળે ખૂલી જાય છે. એટલું જ નહીં, જો માલિકના હાથમાં સામાન હોય, તો કારની પાછળ જતાં જ ટ્રંક (ડેકી) આપમેળે ખૂલી જાય છે. આ કોઈ પ્રોટોટાઇપ નથી, પરંતુ ચીનના શહેરોમાં Li Auto, NIO અને AITO M9 જેવા વાહનોમાં આ ટેકનોલોજી સામાન્ય બની ગઈ છે.આ કારોમાં સૌથી આશ્ચર્યજનક ફીચર છે 'એર સસ્પેન્શન'. જ્યારે કાર માલિક તેની નજીક આવે છે, ત્યારે કાર તેની ઊંચાઈને પારખી લે છે અને પ્રવેશવામાં સરળતા રહે તે માટે એર સસ્પેન્શનનો ઉપયોગ કરીને પોતાની ઊંચાઈ ઘટાડી દે છે (નીચી નમી જાય છે). જાણે કાર તેના માલિકનું સન્માન કરી રહી હોય તેવું દ્રશ્ય સર્જાય છે. જેવી વ્યક્તિ કારમાં બેસે, એટલે કાર ફરીથી પોતાની સામાન્ય ઊંચાઈ પર આવી જાય છે.તમારે પાર્કિંગ લોટમાં કાર શોધવા જવાની જરૂર નથી. 'રિમોટ સમન્સ' ટેકનોલોજીની મદદથી કાર મુશ્કેલ પાર્કિંગ સ્પોટમાંથી આપમેળે બહાર નીકળીને માલિક પાસે પહોંચી જાય છે. રાત્રિના સમયે માલિક નજીક આવતા જ કારની હેડલાઇટ્સ અને ઇન્ટિરિયર લાઇટ્સ આપમેળે ચાલુ થઈ જાય છે, જે એક હાઈ-ટેક 'વેલકમ' જેવો અનુભવ આપે છે.જ્યારે અમેરિકા અને યુરોપના ઘણા દેશો હજુ પણ ડ્રાઈવરલેસ કારના નિયમોમાં ગૂંચવાયેલા છે, ત્યારે ચીને આ ટેકનોલોજીને સામાન્ય લોકોના જીવનનો હિસ્સો બનાવી દીધી છે. એડપ્ટિવ એર સસ્પેન્શન, મેમરી પાર્કિંગ અને જેસ્ચર કંટ્રોલ જેવી સુવિધાઓ હવે ત્યાં લક્ઝરી નહીં પણ જરૂરિયાત બની રહી છે. આ વાયરલ વીડિયોએ પશ્ચિમી દેશોની ઓટોમોબાઈલ કંપનીઓને પણ વિચારતા કરી દીધી છે.