જમીન વિવાદ વચ્ચે મોર્બીના મેયર-ચૂંટાયેલા ગણેશ ડાભીને લઈને વિવાદ

મોરબી શહેરમાં સ્થાનિક સ્વરાજ્યની ચૂંટણી પૂર્ણ થયા બાદ રાજકીય ગરમાવો વધ્યો છે. મહાનગરપાલિકાના સંભવિત મેયર પદને લઈને ચર્ચા વચ્ચે વોર્ડ નંબર–10માંથી વિજેતા બનેલા ભાજપના ઉમેદવાર ગણેશ ડાભી વિવાદના કેન્દ્રમાં સપડાયા છે. ગણેશ ડાભી સામે જમીન સંબંધિત વિવાદમાં સોશિયલ મીડિયામાં વહેતા થયેલા ઓડિયો, સીસીટીવીમાં જમીન માલિકને ગણેશ ડાભી પોતાની ઓફિસે બોલાવતા હોવાનો, ધમકી અપાતી હોવાનો દાવો કરવામાં આવી રહ્યો છે. સાથે જ કેટલાક દ્રશ્યોમાં ભાડૂતી લોકો દ્વારા હુમલો કરાવવામાં આવ્યો હોવાના આક્ષેપો પણ સામે આવ્યા છે. ખેડૂતો દ્વારા કરવામાં આવેલા આક્ષેપ મુજબ ગણેશ ડાભી અને ડી.એલ. રંગપરિયાએ ખેડૂતોની જમીન લીધી હતી, પરંતુ તેની સંપૂર્ણ રકમ ચૂકવવામાં આવી નથી. આ મુદ્દે અગાઉ ખેડૂતો દ્વારા પોલીસ લોક દરબારમાં પણ રજૂઆત કરવામાં આવી હતી, છતાં યોગ્ય નિકાલ ન આવતા ખેડૂતોએ આત્મવિલોપનની ચીમકી ઉચ્ચારી હોવાનું જાણવા મળે છે. ખેડૂતોનું કહેવું છે કે અમને અથવા અમારા પરિવારને કંઈ પણ નુકસાન થશે તો તેના માટે ગણેશ ડાભી અને ડી.એન. રંગપરિયા જવાબદાર રહેશે. ગણતરીના દિવસોમાં મેયરના નામની જાહેરાત થવાની છે અને સેન્સ પ્રક્રિયા ચાલી રહી છે ત્યારે આ મુદ્દો સળગતા સ્થાનિક રાજકારણ ગરમાયું છે. હું તો મદદરૂપ થયો હતો, આ મામલો 18 મહિના જૂનો છે: ડાભી આક્ષેપોને લઈને ગણેશ ડાભીએ જણાવ્યું હતું કે હું કોઇ જમીન-મકાનના કોઈ વ્યવસાય સાથે સંકળાયેલો નથી અને સમાજના વ્યક્તિ તરીકે માત્ર મદદરૂપ બન્યો હતો. આ સમગ્ર મામલો અંદાજે 18 મહિના જૂનો છે અને પેમેન્ટ પણ પૂર્ણ થઈ ચૂક્યું છે. હાલમાં અચાનક આક્ષેપો સામે આવવા પાછળ રાજકીય કાવતરું જ હોઇ શકે.