ધરમપુર નગરપાલિકાએ ગટરની કાર્યક્ષમ સફાઈ માટે અદ્યતન સુપર સકર મશીન તૈનાત કર્યું

ધરમપુર નગરપાલિકા દ્વારા નગરની ભૂગર્ભ ગટર લાઈનો અને ચેમ્બરોને સાફ કરવા માટે અત્યાધુનિક સુપર સકર મશીનનો ઉપયોગ શરૂ કરવામાં આવ્યો છે. આ મશીન ગટરમાં રહેલા કાદવ અને પથ્થરોને 60 ફૂટની ઊંડાઈએથી ખેંચવાની ક્ષમતા ધરાવે છે. આ સામાન્ય જેટિંગ મશીનો કરતા આ મશીન વધુ શક્તિશાળી છે. આ મશીન ગટરનું પાણી ખેંચી તેને ફિલ્ટર (રિસાઈકલ) કરે છે અને એ જ પાણીને ભારે પ્રેશર સાથે ફરી લાઈનમાં મારે છે. જેથી બ્લોકેજ સંપૂર્ણપણે દૂર થાય છે. મશીનમાં 7000 લિટરની ટેન્ક અને 6 ઇંચના શક્તિશાળી વેક્યુમ પાઈપ છે. 50 થી 60 ફૂટ સુધી જમા થયેલો કાદવ અને પથ્થરો આસાનીથી કાઢી શકાય છે. જેનાથી ગટર લાઈન નવી જેવી ચોખ્ખી થઈ જશે.ધરમપુરના પાલિકા પ્રમુખ મયંક મોદી, ઉપપ્રમુખ ઉમાબેન ભોયા અને ચીફ ઓફિસર વિજય ઈટાલીયા સહિતના હોદ્દેદારોએ સુરત RCM કચેરી ખાતે આ મશીનની જરૂરિયાત અંગે રજૂઆત કરી હતી. GUDCએ આ આધુનિક મશીન ફાળવતા હવે નગરના વિવિધ વિસ્તારોમાં ડ્રેનેજ સફાઈની કામગીરી યુદ્ધના ધોરણે હાથ ધરાઈ છે.