પાટણવાડા પાટીદાર એજ્યુકેશન પ્રમોશન કાઉન્સિલે શૈક્ષણિક ઉત્કૃષ્ટતાની ઉજવણી કરી અને જરૂરિયાતમંદ દીકરીઓને સશક્ત બનાવી

શિક્ષણ અને સંસ્કારના સમન્વય સાથે પાટણવાડા પાટીદાર કેળવણી ઉત્તેજક મંડળ-પાટણ દ્વારા ભાન્ડુ સ્થિત જેઠીબા વાડી ખાતે વાર્ષિક સાધારણ સભા અને તેજસ્વી તારલા સન્માન સમારોહનું આયોજન કરાયું હતું. કાર્યક્રમમાં વર્ષ 2024-25માં શૈક્ષણિક ક્ષેત્રે શ્રેષ્ઠ પ્રદર્શન કરનાર ધોરણ 10 અને 12ના 24 જેટલા પ્રતિભાશાળી વિદ્યાર્થીઓને ચાંદીના શિલ્ડ અને પ્રમાણપત્ર આપી પ્રોત્સાહિત કર્યા હતા. ​પાંચ ગામ લેઉવા પાટીદાર સમાજની જરૂરિયાતમંદ 84 દીકરીઓને ધોરણ-12 પછીના ઉચ્ચ અભ્યાસ માટે કુલ 8,51 લાખના સહાયચેકનું વિતરણ કરાયું હતું.નોંધનીય છે કે અત્યાર સુધીમાં કુલ 656 દીકરીઓ આ યોજનાનો લાભ લઈ ચુકી છે. પાંચ ગામ લેઉવા પાટીદાર સમાજ (સંડેર, વાલમ, ભાન્ડુ, મણુંદ અને બાલીસણા)ના આ સંગમમાં શિક્ષણના ઉત્થાન માટે લાખો રૂપિયાની સહાયના ચેકો અર્પણ કરી અનોખો સેવાયજ્ઞ પ્રગટાવ્યો હતો. મંડળના પ્રમુખ અમૃતભાઈ પટેલે જણાવ્યું હતું કે આ મંડળની સ્થાપના આઝાદી પૂર્વે 1932માં કરાઈ હતી. વડીલોએ રોપેલું કેળવણીનું બીજ આજે વટવૃક્ષ બન્યું છે.આ મંડળ આજે પણ વડીલોના એ જ કેળવણીના વિચારને આગળ ધપાવી રહ્યું છે. જેના કારણે આજે આ સમાજ દેશ-વિદેશમાં વ્યવસાય અને શિક્ષણમાં મોખરાનું સ્થાન ધરાવે છે.​આ પ્રસંગે ઉદ્યોગપતિ અનિલભાઈ પટેલ (મિડાસ- મેટકોન્સ), પૂર્વ મંત્રી કિરીટભાઈ પટેલ અને ભાન્ડુના સરપંચ રીકેશાબેન પટેલ,મંડળના મંત્રી ભરતભાઇ પટેલ ખાસ ઉપસ્થિત રહ્યા હતા.ભોજન દાતા તરીકે ડાહ્યાભાઈ પટેલ પરિવારે સેવા આપી હતી.