ફ્રાન્સે 2026-27 માંથી બિન-EU વિદ્યાર્થીઓ માટે ડ્રાસ્ટિક ટ્યુશન ફી વધારવાની જાહેરાત કરી

પેરિસ, તા.૦૪: વિદેશમાં ઉચ્ચ અભ્યાસ કરવા ઈચ્છતા અને ખાસ કરીને ફ્રાન્સને પોતાની પસંદગીનું સ્થળ માનતા ભારતીય વિદ્યાર્થીઓ માટે ચિંતાજનક સમાચાર સામે આવ્યા છે. ફ્રાન્સ સરકાર દ્વારા જાહેર કરવામાં આવેલી નવી નીતિ મુજબ, શૈક્ષણિક વર્ષ ૨૦૨૬-૨૭થી યુરોપિયન યુનિયન (EU) બહારના તમામ વિદ્યાર્થીઓ માટે ટ્યુશન ફીમાં મોટો વધારો કરવામાં આવશે. આ નવા નિયમ બાદ હવે અત્યાર સુધી મળતી ફી માફીની સુવિધા 'અપવાદ' બની જશે અને ઉંચી ફી ભરવી એ 'નિયમ' બની જશે.નવું ફી માળખું કેવું હશે?નવા અમલીકરણ મુજબ, બિન-યુરોપિયન વિદ્યાર્થીઓએ હવે બેચલર (સ્નાતક) પ્રોગ્રામ માટે વાર્ષિક €૨,૮૯૫ (આશરે ₹૨.૬૦ લાખથી વધુ) અને માસ્ટર્સ ડિગ્રી માટે વાર્ષિક €૩,૯૪૧ (આશરે ₹૩.૫૪ લાખથી વધુ) ચૂકવવા પડશે. અત્યાર સુધી ફ્રાન્સની ઘણી યુનિવર્સિટીઓ પોતાની સ્વાયત્તતાનો ઉપયોગ કરીને આંતરરાષ્ટ્રીય વિદ્યાર્થીઓ પાસેથી ઓછી ફી વસૂલતી હતી, પરંતુ હવે સરકારે આ લવચીકતાનો અંત લાવી દીધો છે.સ્કોલરશિપમાં મળશે નવો વળાંકફ્રાન્સના ઉચ્ચ શિક્ષણ મંત્રી ફિલિપ બેપ્ટિસ્ટના જણાવ્યા અનુસાર, સરકાર આંતરરાષ્ટ્રીય વિદ્યાર્થીઓની ભરતી પ્રક્રિયાને નવું સ્વરૂપ આપી રહી છે. હવે ૬૦% સ્કોલરશિપ માત્ર એવા ક્ષેત્રોના વિદ્યાર્થીઓ માટે અનામત રાખવામાં આવશે જે ભવિષ્યની ટેકનોલોજી સાથે જોડાયેલા છે, જેમ કે:• આર્ટિફિશિયલ ઇન્ટેલિજન્સ (AI)• બાયોટેકનોલોજી• ક્વોન્ટમ સ્ટડીઝ• ડિજિટલ ટેકનોલોજીયુનિવર્સિટીઓ દ્વારા વિરોધના સૂરફ્રાન્સની અગ્રણી શૈક્ષણિક સંસ્થાઓ અને 'ફ્રાન્સ યુનિવર્સિટીઝ' સંગઠને આ નિર્ણયની ટીકા કરી છે. તેમનું કહેવું છે કે આ પગલું ફ્રાન્સની ઉદારવાદી છબી અને આંતરરાષ્ટ્રીય સ્તરે વિદ્યાર્થીઓને આવકારવાની પરંપરાની વિરુદ્ધ છે. વધારાની ફીને કારણે તેજસ્વી પણ આર્થિક રીતે મધ્યમ વિદ્યાર્થીઓ ફ્રાન્સ આવતા અટકાશે, જેની સીધી અસર યુનિવર્સિટીઓની સ્વાયત્તતા અને વૈશ્વિક રેન્કિંગ પર પડી શકે છે.વિદ્યાર્થીઓ પર અસરજે વિદ્યાર્થીઓ ૨૦૨૬-૨૭ના સત્ર માટે અત્યારથી જ આયોજન કરી રહ્યા છે, તેમણે હવે આ નવા આર્થિક બોજને ધ્યાનમાં રાખીને બજેટ બનાવવું પડશે. જોકે, સરકારનું કહેવું છે કે ૧૦% જેટલા અત્યંત તેજસ્વી વિદ્યાર્થીઓને હજુ પણ ફી માફીનો લાભ મળી શકે છે, પરંતુ તેના માટે સ્પર્ધા ખૂબ જ કઠિન બની રહેશે. ફ્રાન્સનો આ નિર્ણય યુરોપમાં અભ્યાસ કરવા ઈચ્છતા લાખો વિદ્યાર્થીઓની ગણતરીઓ બદલી નાખશે તે નક્કી છે.