વડોદરામાં પિકનિક દરમિયાન બે યુવાનો મહિસાગર નદીમાં ડૂબી ગયા

વડોદરા:રજાના દિવસે મિત્રો સાથે પિકનિક મનાવવા ગયેલા યુવકો માટે મહીસાગર નદીનો કિનારો કાળ સાબિત થયો છે. વડોદરા નજીક આવેલા જાણીતા પ્રવાસન સ્થળ કોટના બીચ પર નહાવા પડેલા નવ મિત્રો પૈકી બે યુવકોના ડૂબી જવાથી કરુણ મોત નીપજ્યા છે. આ ઘટનાને પગલે સમગ્ર પંથકમાં અરેરાટી વ્યાપી ગઈ છે. પ્રાપ્ત વિગતો અનુસાર, રજાનો દિવસ હોવાથી નવ મિત્રોનું એક જૂથ વડોદરા પાસે મહીસાગર નદીના કિનારે આવેલા કોટના બીચ પર ફરવા માટે ગયું હતું. ગરમીથી રાહત મેળવવા અને રજાનો આનંદ માણવા માટે આ યુવકો નદીના પાણીમાં નહાવા માટે પડ્યા હતા. પ્રારંભમાં વાતાવરણ ખુશનુમા હતું, પરંતુ અચાનક નદીના પ્રવાહમાં પાંચ મિત્રો તણાવા લાગ્યા હતા. નદીમાં નહાતી વખતે પાણીના વહેણનો અંદાજ ન આવતા પાંચ યુવકો ઉંડા પાણીમાં ગરકાવ થવા લાગ્યા હતા. પોતાના મિત્રોને ડૂબતા જોઈ અન્ય મિત્રોએ બૂમાબૂમ કરી મૂકતા કિનારે હાજર લોકોમાં નાસભાગ મચી ગઈ હતી. પ્રવાહ એટલો તેજ હતો કે યુવકો પોતાનો બચાવ કરી શક્યા નહોતા.