વડોદરામાં બાળકોમાં હિંસક વર્તનમાં વધારોઃ વાલીઓ માટે ચિંતાનો વિષય

વડોદરામાં બાળકોમાં વધી રહેલી હિંસક પ્રવૃત્તિઓ હાલમાં વાલીઓ માટે ચિંતાનો વિષય બની છે. સ્થાનીય વાલીઓના મતે, આજના સમયમાં સોશિયલ મીડિયાનો અનિયંત્રિત ઉપયોગ બાળકોના માનસ પર નકારાત્મક અસર કરી રહ્યો છે. ઈન્ટરનેટ પર પીરસાતું હિંસક કન્ટેન્ટ અને ગેમિંગની લત બાળકોને અગ્રેસિવ બનાવી રહી છે. આ ઉપરાંત, શિક્ષણ ક્ષેત્રે વધતી સ્પર્ધા અને દરેક પ્રવૃત્તિમાં ટોચ પર રહેવાની વાલીઓની જીદ પણ બાળકો પર માનસિક બોજ વધારે છે. જ્યારે બાળકો આ અપેક્ષાઓ પૂરી નથી કરી શકતા, ત્યારે તેઓમાં હતાશા અને ગુસ્સો જોવા મળે છે, જે અંતે હિંસક વર્તનમાં પરિણમે છે. બીજી તરફ, આજના આર્થિક યુગમાં વધતી મોંઘવારીને પહોંચી વળવા માટે માતા-પિતા બંનેએ નોકરી કે વ્યવસાયમાં વ્યસ્ત રહેવું પડે છે. પરિણામે, તેઓ પોતાના સંતાનોને પૂરતો ગુણવત્તાસભર સમય (Quality Time) આપી શકતા નથી. વાલીઓએ સ્વીકાર્યું છે કે બાળકો પર પૂરતું ધ્યાન ન આપવાને કારણે તેઓ એકલતા અનુભવે છે અને ખોટા માર્ગે દોરાય છે. નિષ્ણાતો અને વાલીઓનું માનવું છે કે જો સમયસર બાળકો સાથે સંવાદ સાધવામાં નહીં આવે અને તેમના પર લાદવામાં આવેલા ભણતરના ભારને હળવો કરવામાં નહીં આવે, તો આવનારી પેઢીનું માનસિક સ્વાસ્થ્ય જોખમમાં મુકાઈ શકે છે.