अहिल्यानगर गुन्हेगारीः सासरच्या 12 लाख रुपयांच्या मागणीवरून डॉक्टरची आत्महत्या

Ahilyanagar Crime : फ्लॅट घेण्यासाठी माहेराहून १२ लाख रुपये आणण्यासाठी सासरी होणाऱ्या छळाला कंटाळून २६ वर्षीय महिला डॉक्टरने गळफास घेऊन आत्महत्या केली.अहिल्यानगरच्यापारनेर तालुक्यातील गोरेगाव येथे शनिवारी ही घटना घडली. डॉ. गौरी अमित दळवी-चौरे असे मृत विवाहितेचे नाव आहे. याप्रकरणी तिच्या वडिलांच्या तक्रारीवरून पती अमित बाबासाहेब दळवी, सासू संगीता बाबासाहेब दळवी, सासरा बाबासाहेब हरिभाऊ दळवी यांच्याविरुद्ध गुन्हा दाखल करण्यात आला आहे. याबाबत सुनील जबाजी चौरे यांनी फिर्याद दिली. त्यानुसार गौरीचे लग्न २३ नोव्हेंबर २०२४ रोजी अमित बाबासाहेब दळवी याच्याशी झाले. मुंबईला गेल्यानंतर पती अमित दळवी याने फ्लॅट घेण्यासाठी माहेराहून १२ लाख रुपये आणण्यासाठी गौरीला त्रास देण्यास सुरुवात केली. 'तुम्ही साधे लग्न केले भाड्याच्या घरात राहण्यापेक्षा पैसे आण', असे म्हणून तिचा छळ केला. गौरी ही खासगी रुग्णालयात कार्यरत होती. तिचा पगारही काढून घेतला. लग्नातील दागिनेही बळकावल्याचे गौरीने आई-वडिलांना फोनवर सांगितले होते. पती अमित हा दारूच्या आहारी गेला होता. पैशांसाठी तो सतत तिला मारहाण करीत होता. तसेच त्याचे इतर मुलींशी अनैतिक संबंध असल्याचेही गौरीने फेब्रुवारी २०२६मध्ये माहेरी सांगितले होते. त्यानंतर तिची आई मुंबईला जाऊन वाद मिटवून आली. मात्र, त्यानंतरही छळ सुरू होता. दरम्यान, २७ एप्रिल रोजी गौरी, तिचा पती अमित आणि सासरे बाबासाहेब हे गोरेगाव येथे आले. त्यावेळी अमितने 'तू इथेच थांब, मी पप्पांना नगरला सोडून तुला घ्यायला येतो', असे सांगून निघून गेला. त्यानंतर तो परत आलाच नाही. फोनही घेत नव्हता. २८ एप्रिल रोजी गौरी व तिची आईअहिल्यानगरव मुंबई येथे गेली असता, दोन्ही ठिकाणी घरांना कुलूप लावले होते. त्यानंतर शनिवारी सकाळी गोरेगाव येथील घरात एकटी असताना गौरीने दोरीच्या साहाय्याने गळफास घेतला. आई शेतातून परत आल्यावर हा प्रकार समोर आला. तिला तातडीने पारनेर येथील रुग्णालयात दाखल करण्यात आले, मात्र उपचारापूर्वीच तिचा मृत्यू झाल्याचे डॉक्टरांनी घोषित केले.