भारत-अमेरिका व्यापार करारः विरोधकांच्या टीकेला वाणिज्य मंत्री पियुष गोयल यांची प्रतिक्रिया

Piyush Goyal on Trade Deal: भारत-अमेरिकेमध्ये व्यापार करार झाल्यानंतर अमेरिकेचे राष्ट्राध्यक्ष डोनाल्ड ट्रम्प यांनी या कराराची घोषणा एकतर्फी करून टाकली. या प्रकारामुळे विरोधकांनी केंद्र सरकारविरोधात टीकेची झोड उठवल्यानंतर आता वाणिज्य आणि उद्योग मंत्री पियुष गोयल यांनी यावर उत्तर दिले आहे. अमेरिकेचे राष्ट्राध्यक्ष डोनाल्ड ट्रम्प यांनी भारतावर लादलेले आयातशुल्क मागे घेतल्यामुळे त्यांनी सोशल मीडियावर पोस्ट करून याची माहिती दिली, असे गोयल म्हणाले. केंद्रीय वाणिज्य आणि उद्योग मंत्री पियुष गोयल म्हणाले की, भारतावरचे आयातशुल्क त्यांच्याकडून लादले गेले होते. त्यामुळे साहजिकच याची माहिती त्यांनीच जगाला करून देणे अपेक्षित होते. तसेच पंतप्रधाननरेंद्र मोदीयांच्या नेतृत्वात आतापर्यंतची भारत आणि अमेरिका यांच्यातील सर्वात चांगला व्यापार करार झाला आहे. भारत आणि अमेरिका लवकरच व्यापार करारावर संयुक्त निवेदन प्रसिद्ध करतील, असेही गोयल म्हणाले. करारावर अंतिम संमती झाल्यानंतर आणि तांत्रिक प्रक्रिया पूर्ण केल्यानंतर त्याबद्दलचा तपशील जाहीर केला जाईल, असेही ते म्हणाले. लोकसभेत आज या विषयावर चर्चा होत असताना विरोधकांनी गोंधळ घातल्याबद्दल गोयल यांनी नाराजी व्यक्त केली. ते म्हणाले, विरोधक आजवर विचारत होते की, अमेरिका आणि भारतामधील व्यापार करार कधी होणार, असा प्रश्न विरोधक विचारत होते. पंतप्रधान मोदींनी आतापर्यंतचा सर्वात चांगला करार केला आहे. पंतप्रधान मोदी आणि ट्रम्प यांच्यातील मैत्रीमुळेच हा करार पुर्णत्वास जाण्यास मदत झाली. पंतप्रधान मोदी यांनी अमेरिकेचे राष्ट्राध्यक्ष डोनाल्ड ट्रम्प यांच्याशी असलेल्या चांगल्या आणि विश्वासाच्या संबंधाच्या जोरावर व्यापार करार केला आहे. या करारामुळे शेतकरी, एमएसएमई क्षेत्र आणि उद्योग जगताला मोठा लाभ मिळेल. तसेच अर्थव्यवस्थेला बळकटी आणण्यात आणि रोजगाराच्या संधी वाढविण्यातही या कराराचा उपयोग होणार आहे, असेही पियुष गोयल म्हणाले.