ଏପଷ୍ଟାଇନ୍ ଫାଇଲ୍ ସଂଯୋଗର ଗ୍ଲୋବାଲ୍ ୱେବ୍ ଉନ୍ମୋଚନ କରେ ଆନ୍ତର୍ଜାତୀୟ ଉତ୍ତେଜନାର ଏକ ନୂତନ ଯୁଗ?

ନୂଆଦିଲ୍ଲୀ ୦୪/୦୨:‘ଏପ୍‌ଷ୍ଟିନ୍‌ ଫାଇଲ୍ସ’ର ଗୋଟିଏ ପରେ ଗୋଟିଏ ରହସ୍ୟ ଫିଟୁଛି । ଅନେକ ଦେଶର ହାଇପ୍ରୋଫାଇଲ୍ ବ୍ୟକ୍ତିତ୍ୱଙ୍କ ନାଁ ସାମ୍ନାକୁ ଆସୁଛି । ଟ୍ରମ୍ପ୍, ବିଲ୍ ଗେଟ୍ସଙ୍କଠୁ ୟୁରୋପ, ମଧ୍ୟ ପ୍ରାଚ୍ୟ ଏପରିକି ଆଫ୍ରିକା ଓ ଏସିଆର ଅନେକ ଦେଶର ପ୍ରମୁଖ ରାଜନେତା, ଉଦ୍ୟୋଗୀ, କଳାକାର, ଏପରିକି ଶିକ୍ଷାବିତ୍ ଓ ବୈଜ୍ଞାନିକଙ୍କ ପାଖରେ ଏହା ପହଞ୍ଚିଛି । ଏହି କ୍ରମରେ ଦୀର୍ଘ ସମୟ ଧରି ଆମେରିକାର ଶକ୍ତିଶାଳୀ ବ୍ୟକ୍ତି ଥିବା ଜେଫରୀ ଏପ୍‌ଷ୍ଟିନ୍‌ଙ୍କ ସେହି କୁଖ୍ୟାତ ଦ୍ୱୀପର କାହାଣୀ, ଯାହା ତାଙ୍କ ଦୁଷ୍କର୍ମର ଆଡ୍ଡା ଥିଲା ତାକୁ ନେଇ ଆଶ୍ଚର୍ଯ୍ୟଚକିତ ରିପୋର୍ଟ ସାମ୍ନାକୁ ଆସିଛି । ଏବେ ଗ୍ରୀନ୍‌ଲାଣ୍ଡକୁ ନେଇ ଆମେରିକା ଓ ଡେନ୍‌ମାର୍କ ମଧ୍ୟରେ ଉତ୍ତେଜନା ଦେଖାଦେଇଛି । ଦୁଇ ଦେଶ ମଧ୍ୟରେ କିଛି ଦ୍ୱୀପର କିଣାବିକାକୁ ନେଇ ଦୀର୍ଘ ଦଶନ୍ଧି ପୂର୍ବେ ଏକ ଚୁକ୍ତି ହୋଇଥିଲା । ପରେ ତନ୍ମଧ୍ୟରୁ ଗୋଟିଏ ଦ୍ୱୀପ ଜେଫରୀ ଏପ୍‌ଷ୍ଟିନ କିଣିଥିଲେ ଏବଂ ତାକୁ ନିଜ କୁଚ୍ଛିତ କାର୍ଯ୍ୟର ଠିକଣା କରିଥିଲେ । ନ୍ୟୁୟର୍କ ପୋଷ୍ଟ୍‌ର ରିପୋର୍ଟ ଅନୁସାରେ, ଆମେରିକା ଡେନ୍‌ମାର୍କଠୁ ଜାଗା କିଣିବା ସମୟରେ ଏପ୍‌ଷ୍ଟିନ୍‌ ଦ୍ୱୀପ କିଣାଯାଇଥିଲା । ୧୯୧୭ର ଡେନ୍‌ମାର୍କ ୱେଷ୍ଟଇଣ୍ଡିଜ୍ ଚୁକ୍ତିନାମା ଅନୁସାରେ, ଆମେରିକା ୨.୫ କୋଟି ଡଲାର (ବର୍ତ୍ତମାନ ହାରାହାରି ୬୩.୩ କୋଟି ଡଲାର) ରେ ଭର୍ଜିନ ଦ୍ୱୀପସମୂହକୁ କିଣିଥିଲା । ସେଥିରେ ପ୍ରାୟ ୬୦ ଦ୍ୱୀପ ଥିଲା । ତନ୍ମଧ୍ୟରୁ ୭୦ ଏକରବିଶିଷ୍ଟ ଲିଟିଲ୍ ସେଣ୍ଟ ଜେମ୍ସ ଦ୍ୱୀପକୁ ଏପ୍‌ଷ୍ଟିନ ୧୯୯୮ରେ କିଣିଥିଲେ, ଯାହା ତାଙ୍କର ମୁଖ୍ୟ ବାସସ୍ଥଳୀ ପାଲଟିଥିଲା । ଏଠାରେ ସେ ନାବାଳିକାଙ୍କ ସହ ଯୌନ ଶୋଷଣ ଭଳି ଘୃଣ୍ୟ ପାର୍ଟି ଆୟୋଜନ କରୁଥିଲେ । ୨୦୧୯ରେ ତାଙ୍କ ମୃତ୍ୟୁ ପରଠୁ ଏହି ଦ୍ୱୀପ ‘ଏପ୍‌ଷ୍ଟିନ ଦ୍ୱୀପ’ ବା ‘ପେଡୋଫାଇଲ ଦ୍ୱୀପ’ ନାମରେ ପରିଚିତ ହୋଇଛି । ଦ୍ୱୀପକୁ ୨୦୦୦ ବିମାନର ହିସାବ ନାହିଁ: ସଦ୍ୟ ରିପୋର୍ଟ ଅନୁସାରେ, ଏପ୍‌ଷ୍ଟିନଙ୍କ ଦ୍ୱୀପକୁ ୨୦୦୦ରୁ ଅଧିକ ଏଭଳି ବିମାନ ଆସିଥିଲା, ଯାହାର ରିପୋର୍ଟ କରାଯାଇ ନ ଥିଲା । ଦ୍ୱୀପକୁ ଆସୁଥିବା ଲୋକଙ୍କ ନାଁ କଦାପି ସାମ୍ନାକୁ ନ ଆସିବା ଲାଗି ଏପରି କରାଯାଇଥିଲା । ଏକ ରିପୋର୍ଟରେ ଏ ବିଷୟ ଏବେ ସାମ୍ନାକୁ ଆସିଛି । ନୂଆ ତଥ୍ୟ ବିଶ୍ଳେଷଣରୁ ଏପ୍‌ଷ୍ଟିନଙ୍କ ଦ୍ୱୀପକୁ ହୋଇଥିବା ୨ ହଜାରରୁ ଅଧିକ ଉଡ଼ାଣ ବିଷୟରେ ଜଣାପଡ଼ିଛି, ଯାହାର ରିପୋର୍ଟ ପୂର୍ବରୁ ନ ଥିଲା । ଜାଲିଙ୍ଗୋ ଡାଟା ରିଫାଇନାରୀ ଦ୍ୱାରା କରାଯାଇଥିବା ଯାଞ୍ଚ୍‌ରୁ ଏପ୍‌ଷ୍ଟିନ୍‌ ଦ୍ୱୀପ ସହ ସଂଶ୍ଳିଷ୍ଟ ସେହି ରହସ୍ୟାବୃତ୍ତ ବିମାନ ଯାତ୍ରାର ତଥ୍ୟ ସାମ୍ନାକୁ ଆସିଛି । ଯାଞ୍ଚ୍‌ରୁ ୧୯୯୫-୨୦୦୭ ମଧ୍ୟରେ ୫,୨୫୩ ଉଡ଼ାଣ ରେକର୍ଡରେ ଏପ୍‌ଷ୍ଟିନ ଦ୍ୱୀପକୁ ୨,୩୪୮ ଅତିରିକ୍ତ ଉଡ଼ାଣର ତଥ୍ୟ ମିଳିଛି । ଏଥିରେ ଦ୍ୱୀପକୁ ଅତିକମ୍‌ରେ ୪,୯୬୬ଟି ରିପୋର୍ଟ ଓ ଅଣ-ରିପୋର୍ଟ ଉଡ଼ାଣ ରେକର୍ଡ ହୋଇଛି । ଦ୍ୱୀପକୁ ବ୍ୟକ୍ତିଗତ ଗନ୍ତବ୍ୟ ସ୍ଥଳ ସହ ଯୋଡୁଥିବା ପୂର୍ବରୁ ଅଜ୍ଞାତ ୧,୦୮୯ ଉଡ଼ାଣ ମାର୍ଗ ବି ଯାଞ୍ଚକର୍ତ୍ତା ଚିହ୍ନଟ କଲେ । ଗବେଷକ ଟିମ୍ ଅନୁସାରେ, ସାର୍ବଜନୀନ ରୂପେ ଉପଲବ୍ଧ ନ୍ୟାୟ ବିଭାଗର ରେକର୍ଡରୁ ଏହି ନିଷ୍କର୍ଷ ସଂକଳିତ କରାଯାଇଥିଲା । ସଠିକତା ସୁନିଶ୍ଚିତ କରିବା ପାଇଁ ୩ ବ୍ୟକ୍ତିଗତ ଉତ୍ସ ଏହାକୁ ସ୍ପଷ୍ଟ କରିଥିଲେ । ତଥ୍ୟ ଏକତ୍ର କରିବା ପରେ ଦ୍ୱୀପକୁ କେତେ ବିମାନ ଆସିଥିଲା ଏବଂ କେଉଁଠୁ ଆସିଥିଲା, ଜାଣିବାରେ ସେମାନେ ସକ୍ଷମ ହେଲେ । ଜାଲିଙ୍ଗୋ ଡାଟା ରିଫାଇନାରୀର ସିଇଓ କହିଛନ୍ତି, ସାର୍ବଜନୀନ ରୂପେ ଜଣାଶୁଣା ୨୦ରୁ ୩୦ ଉଡ଼ାଣ ମାର୍ଗ ତୁଳନାରେ ୧,୦୮୩ ଏଭଳି ଉଡ଼ାଣ ମାର୍ଗ ଥିଲା, ଯାହା ବିଷୟରେ ପୂର୍ବରୁ ସୂଚନା ନ ଥିଲା । ଯେଉଁ ତଥ୍ୟ ସେ ଅଦ୍ୟାବଧି ସାମ୍ନାକୁ ଆଣିଛନ୍ତି, ତା’ର କେବଳ ଗୋଟିଏ ଅଂଶ ଲୋକଙ୍କ ସାମ୍ନାକୁ ଅଣାଯାଇଛି ବୋଲି ସିଇଓ କହିଛନ୍ତି । ୨,୩୪୮ ଜଣ ଏପ୍‌ଷ୍ଟିନ ଦ୍ୱୀପକୁ ଯାଇଥିବା ସେମାନେ ଜାଣିବାକୁ ପାଇଛନ୍ତି । ପୂର୍ବରୁ କେବଳ ୧୫୦-୨୦୦ ଲୋକଙ୍କ ବିଷୟରେ ସେମାନେ ଜାଣିଥିଲେ । ଏଥିରୁ ସ୍ପଷ୍ଟ ଯେ କେବଳ କିଛି ଲୋକ ଦ୍ୱୀପକୁ ଯାଉନଥିଲେ, ସେଠାରେ ଆହୁରି ବହୁତ କିଛି ହେଉଥିଲା । ଏପ୍‌ଷ୍ଟିନ କେବଳ ବିଶ୍ୱର ପ୍ରଭାବଶାଳୀ ଲୋକଙ୍କ ପାଇଁ ଅନୈତିକ କାର୍ଯ୍ୟ ପାଇଁ ଏକ ଆଡ୍ଡା ଖୋଲିନଥିଲେ, ବରଂ ସେଠାକୁ ଯାଉଥିବା ନାମୀଦାମୀ ଲୋକଙ୍କ ପରିଚୟ ଲୁଚାଇବା ପାଇଁ ଉଚ୍ଚ ସ୍ତରରୁ ବ୍ୟକ୍ତିଗତ ବିମାନ, ହେଲିକପ୍ଟର, ପ୍ରାଇଭେଟ୍ ଜେଟ୍ ଓ ଚାର୍ଟର ବିମାନର ରିପୋର୍ଟ ବି କରାଇନଥିଲେ । ସେଥିପାଇଁ କିଏ କେତେବେଳେ ଓ କେଉଁଠୁ ଏହି ଦ୍ୱୀପକୁ ଆସିଲେ ଓ ଗଲେ ଜଣାପଡ଼ିଲା ନାହିଁ । ​​​​​​​ ଆହୁରି ପଢ଼ନ୍ତୁ...ସଙ୍କଟ ଘେରରେ ନରୱେର ରାଜ ପରିବାର: ଏପଷ୍ଟିନ୍ ‘ରେପ୍ ଭିଲା’ରେ ୪ ଦିନ ବିତାଇଥିଲେ ଭାବି ରାଣୀ, ପୁଅ ଉପରେ ବି ଗମ୍ଭୀର ଅଭିଯୋଗ ଜେଫରୀ ଏପ୍‌ଷ୍ଟିନ୍‌ କିଏ? ଜେଫରୀ ଏପ୍‌ଷ୍ଟିନ୍‌ ଆମେରିକାର ଜଣେ ବଡ଼ ଫାଇନାନ୍ସର ଥିଲେ । ତାଙ୍କ ପହଞ୍ଚ ଏମିତି ଥିଲା ଯେ ଟ୍ରମ୍ପ୍, ବିଲ କ୍ଲିଣ୍ଟନ୍, ବ୍ରିଟିଶ ରାଜ ପରିବାର ସଦସ୍ୟଙ୍କ ସମେତ ବିଶ୍ୱର ତମାମ ବଡ଼ ଉଦ୍ୟୋଗପତି, ଧନୀ ବ୍ୟକ୍ତି ବି ତାଙ୍କ ପାଖକୁ ଆସୁଥିଲେ । ଏପ୍‌ଷ୍ଟିନ୍‌ ୨୦୧୧ରେ ନ୍ୟୁୟର୍କ ପୋଷ୍ଟକୁ କହିଥିଲେ, ସେ ଯୌନ ଅପରାଧୀ ନୁହନ୍ତି । କେବଳ ଜଣେ ଅପରାଧୀ । ନାବାଳିକାଙ୍କ ଚୋରା ଚାଲାଣ ଓ ସେମାନଙ୍କୁ ଯୌନ ଉତ୍ପୀଡ଼ନ ଅଭିଯୋଗରେ ତାଙ୍କ ବିରୋଧରେ ମକଦ୍ଦମା ଚାଲିଥିବା ବେଳେ ୨୦୧୯, ଅଗଷ୍ଟ ୧୦ରେ ନ୍ୟୁୟର୍କର ଏକ ଜେଲରେ ତାଙ୍କର ମୃତ୍ୟୁ ହୋଇଥିଲା । ତାଙ୍କ ବିରୋଧରେ ନାବାଳିକାଙ୍କୁ ଯୌନ ଶୋଷଣର ଏକ ବିଶାଳ ନେଟ୍‌ୱର୍କ ଚଳାଇବାର ଅଭିଯୋଗ ହୋଇଥିଲା । ଏହା ପୂର୍ବରୁ ନାବାଳିକାଙ୍କୁ ବେଶ୍ୟାବୃତ୍ତିରେ ଲଗାଇବା ଅଭିଯୋଗରେ ସେ ଦୋଷୀ ସାବ୍ୟସ୍ତ ହୋଇ ଜେଲ୍‌ରେ ଥିଲେ । ନ୍ୟୁୟର୍କରେ ଜନ୍ମିତ ଓ ବଢ଼ିଥିବା ଏପ୍‌ଷ୍ଟିନ ୭୦ ଦଶକ ମଧ୍ୟ ଭାଗରେ ସହରର ଘରୋଇ ଡାଲ୍‌ଟନ୍‌ ସ୍କୁଲରେ ଗଣିତ ଓ ଭୌତିକ ବିଜ୍ଞାନରେ ଶିକ୍ଷକତା କରୁଥିଲେ । ୧୯୮୨ ସୁଦ୍ଧା ସେ ନିଜର କମ୍ପାନି ଜେ ଏପ୍‌ଷ୍ଟିନ ଖୋଲି ସାରିଥିଲେ । କମ୍ପାନି ଗ୍ରାହକଙ୍କ ୮୦ କୋଟି ପାଉଣ୍ଡରୁ ଅଧିକ ମୂଲ୍ୟର ସମ୍ପତ୍ତିର ପ୍ରବନ୍ଧନ ଜରିଆରେ ଖୁବ୍‌ଶୀଘ୍ର ସଫଳ ହେଲା ଏବଂ ଏପ୍‌ଷ୍ଟିନ ସମ୍ପତ୍ତିକୁ ଖର୍ଚ୍ଚ କରିବା ଆରମ୍ଭ କରିଦେଲେ । ତନ୍ମଧ୍ୟରେ ଫ୍ଲୋରିଡ଼ାରେ ଏକ ଭବ୍ୟ ଘର, ନ୍ୟୁ ମେକ୍ସିକୋରେ ଏକ ଫାର୍ମହାଉସ୍ ଓ ନ୍ୟୁୟର୍କରେ ସବୁଠୁ ବଡ଼ ଘର କିଣିବା ଆଦି ସାମିଲ । ସେ ଧୀରେ ଧୀରେ ପ୍ରସିଦ୍ଧ ବ୍ୟକ୍ତି, କଳାକାର ଓ ରାଜନେତାଙ୍କ ସହ ମିଳାମିଶା ବଢ଼ାଇବାକୁ ଲାଗିଲେ । ଟ୍ରମ୍ପ୍, କ୍ଲିଣ୍ଟନ ଭଳି ବ୍ୟକ୍ତିଙ୍କ ସହ ଥିଲା ବନ୍ଧୁତା ଟ୍ରମ୍ପ୍ ୨୦୦୨ରେ ଏପ୍‌ଷ୍ଟିନ୍‌ଙ୍କ ଉପରେ ନ୍ୟୁୟର୍କ ପତ୍ରିକା ପାଇଁ ଲେଖିଥିବା ଏକ ନିବନ୍ଧରେ କହିଥିଲେ, ମୁଁ ଜେଫ୍ରୀଙ୍କୁ ୧୫ ବର୍ଷ ହେଲା ଜାଣିଛି । ସେ ଅତି ଚମତ୍କାର ବ୍ୟକ୍ତି । ତାଙ୍କ ସହ ସମୟ ବିତାଇବା ମଜାଦାର । ଆହୁରି ମଧ୍ୟ କୁହାଯାଏ, ତାଙ୍କୁ ସୁନ୍ଦରୀ ମହିଳା ସେତିକି ପସନ୍ଦ ଯେତିକି ମୋତେ । ସେମାନଙ୍କ ମଧ୍ୟରେ ଅନେକ କମ୍ ବୟସର । ୨୦୦୨ରେ ଏପ୍‌ଷ୍ଟିନ ପୂର୍ବତନ ରାଷ୍ଟ୍ରପତି ବିଲ କ୍ଲିଣ୍ଟନ୍ ଓ କଳାକାର କେଭିନ ସ୍ପେସି ଓ କ୍ରିସ୍ ଟକରଙ୍କୁ ସ୍ୱତନ୍ତ୍ର ରୂପେ ପ୍ରସ୍ତୁତ ଏକ ବ୍ୟକ୍ତିଗତ ଜେଟ୍‌ରେ ଆଫ୍ରିକା ଯାତ୍ରା କରାଇଥିଲେ । ୨୦୦୩ରେ ସେ ତତ୍କାଳୀନ ଫିଲ୍ମ ନିର୍ମାତା ହାର୍ଭେ ୱେନ୍‌ଷ୍ଟିନ୍‌ଙ୍କ ସହ ନ୍ୟୁୟର୍କ ପତ୍ରିକା କିଣିବାର ଅସଫଳ ପ୍ରୟାସ କରିଥିଲେ । ସେହି ବର୍ଷ ସେ ହାର୍ଭାର୍ଡ ବିଶ୍ୱବିଦ୍ୟାଳୟକୁ ୩ କୋଟି ଡଲାର ଦାନ କରିଥିଲେ ।