କେରଳ ବିଧାନସଭା ନିର୍ବାଚନ ପରେ ପରବର୍ତ୍ତୀ ମୁଖ୍ୟମନ୍ତ୍ରୀ ଚୟନ କରିବ କଂଗ୍ରେସ

ଥିରୁଅନନ୍ତପୁରମ୍ ୦୫/୦୫:କେରଳ ବିଧାନସଭା ନିର୍ବାଚନରେ କଂଗ୍ରେସକୁ ବହୁମତ ମିଳିବା ପରେ ଏବେ କିଏ ମୁଖ୍ୟମନ୍ତ୍ରୀ ହେବେ ତାକୁ ନେଇ ଚର୍ଚ୍ଚା ଜୋର ଧରିଛି । ଚୂଡ଼ାନ୍ତ ନିଷ୍ପତ୍ତି ପୂର୍ବରୁ କେରଳ କଂଗ୍ରେସର ବରିଷ୍ଠ ପର୍ଯ୍ୟବେକ୍ଷକ ଇମରାନ ପ୍ରତାପଗଢ଼ିଙ୍କ ବୟାନ ସାମ୍ନାକୁ ଆସିଛି । କେରଳରେ କଂଗ୍ରେସର ୪ରୁ ୫ ମୁଖ୍ୟମନ୍ତ୍ରୀ ଚେହେରା ଅଛନ୍ତି । ତେବେ ଦଳ ଏବଂ ବିଧାୟକମାନେ କେରଳ ମୁଖ୍ୟମନ୍ତ୍ରୀଙ୍କୁ ବାଛିବେ ବୋଲି ପ୍ରତାପଗଢ଼ି କହିଛନ୍ତି । ସେ କହିଛନ୍ତି, କେରଳରେ ଚିଠାରୁ ମୁଖ୍ୟମନ୍ତ୍ରୀ ବଛା ଯାଏନାହିଁ । ବରଂ ଦଳ ଉଚିତ ପ୍ରକ୍ରିୟା ମାଧ୍ୟମରେ ମୁଖ୍ୟମନ୍ତ୍ରୀ ଚୟନ କରିଥାଏ । କଂଗ୍ରେସ କାର୍ଯ୍ୟକର୍ତ୍ତାଙ୍କ ଯୋଗୁ କେରଳରେ ଏହି ସଫଳତା ମିଳିଛି । ଜନତା ପିନାରାୟୀ ବିଜୟନ ଏବଂ ମୋଦିଙ୍କ ମିଲିଭଗତକୁ ଖାରଜ କରିଛନ୍ତି । ପିନାରାୟୀଙ୍କ ଉପରେ ଥିବା ଜନତାଙ୍କ କ୍ରୋଧ ନିର୍ବାଚନ ଫଳାଫଳରେ ଦେଖିବାକୁ ମିଳିଥିବା ସେ ପ୍ରକାଶ କରିଛନ୍ତି । ​​​​​​​ ମୁଖ୍ୟମନ୍ତ୍ରୀ ପଦ ପାଇଁ ସବୁଠୁ ଅଧିକ ଚର୍ଚ୍ଚାରେ ବର୍ତ୍ତମାନ କେରଳ ବିଧାନସଭାରେ ବିରୋଧୀ ଦଳ ନେତା ଭି.ଡି ସତୀଶନଙ୍କ ନାଁ ରହିଛି । ବିରୋଧୀ ଦଳ ନେତା ଭାବେ ତାଙ୍କର ଭୂମିକା ଏବଂ ନିର୍ବାଚନ ପ୍ରଚାର ସମୟରେ ଦୃଢ଼ ପ୍ରଦର୍ଶନ ଯୋଗୁ ତାଙ୍କ ନାଁ ଦୌଡ଼ରେ ସବୁଠୁ ଆଗରେ ରହିଛି । ଆଲାପୁଝା ଲୋକସଭା ନିର୍ବାଚନ ମଣ୍ଡଳୀରୁ ସାଂସଦ ଥିବା କେ.ସି ବେଣୁଗୋପାଳ ମଧ୍ୟ ମୁଖ୍ୟମନ୍ତ୍ରୀ ପଦ ଦୌଡ଼ରେ ଅଛନ୍ତି । ଯଦି ଦଳର ସାଧାରଣ ସମ୍ପାଦକ ବେଣୁଗୋପାଳ ରାଜି ହୁଅନ୍ତି ତେବେ ତାଙ୍କୁ ମଧ୍ୟ ମୁଖ୍ୟମନ୍ତ୍ରୀ କରାଯାଇପାରେ ବୋଲି ଦଳର ବରିଷ୍ଠ ନେତା ତାରିକ୍ ଅନୱର କହିଛନ୍ତି । ବରିଷ୍ଠ କଂଗ୍ରେସ ନେତା ରମେଶ ଚେନ୍ନିଥାଲାଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି । ବିଦାୟୀ ମୁଖ୍ୟମନ୍ତ୍ରୀ ବିଜୟନ୍‌ଙ୍କ ପ୍ରଥମ ସରକାର କାଳରେ ସେ ବିରୋଧୀ ଦଳ ନେତା ଭାବେ କାର୍ଯ୍ୟ କରିଥିଲେ । ରିପୋର୍ଟ ଅନୁସାରେ, ଚେନ୍ନିଥାଲା ହରିପାଦ ବିଧାନସଭା ନିର୍ବାଚନ ମଣ୍ଡଳୀରେ ବିପୁଳ ବିଜୟ ହାସଲ କରିଛନ୍ତି । ମୁଖ୍ୟମନ୍ତ୍ରୀ ଦୌଡ଼ରେ ବରିଷ୍ଠ କଂଗ୍ରେସ ନେତା ଶଶି ଥରୁରଙ୍କ ନାଁ ମଧ୍ୟ ରହିଛି । ବିଜେପି ପ୍ରତି ତିରୁଅନନ୍ତପୁରମ ସାଂସଦଙ୍କ କୋହଳ ଆଭିମୁଖ୍ୟ ଯୋଗୁ ନିକଟ ଅତୀତରେ ସେ କଂଗ୍ରେସକୁ ସମାଲୋଚନା କରି ବିବାଦକୁ ଆସିଥିଲେ ହେଁ ତାଙ୍କ ନାମକୁ ସମ୍ପୂର୍ଣ୍ଣ ଭାବେ ଏଡ଼ାଇ ଦିଆଯାଇପାରିବ ନାହିଁ । ପୂର୍ବରୁ ଏ ନେଇ ଥରୁରଙ୍କୁ ପଚରାଯିବାରେ ସେ କହିଥିଲେ ଯେ, ଦିଲ୍ଲୀ ହାଇକମାଣ୍ଡ ହିଁ ଏ ବାବଦରେ କହିପାରିବେ । ଆହୁରି ପଢ଼ନ୍ତୁ...West Bengal CM Race : ଦିଦି ଗଲେ ଫୁଟିଲା ପଦ୍ମ; ଏବେ ବଙ୍ଗ ଗାଦିରେ କିଏ ବସିବ ? ମୁଖ୍ୟମନ୍ତ୍ରୀ ରେସ୍ରେ ୬ ବଡ଼ ନାମ