ଚୀନର ହୁନାନ ପ୍ରଦେଶରେ ଆତସବାଜି କାରଖାନାରେ ଭୟଙ୍କର ବିସ୍ଫୋରଣ

ନୂଆଦିଲ୍ଲୀ, ୫।୫: ଚୀନରୁ ଏକ ହୃଦୟବିଦାରକ ଖବର ସାମ୍ନାକୁ ଆସିଛି । ସୋମବାର ସନ୍ଧ୍ୟାରେ ଏକ ବାଣ କାରଖାନାରେ ହୋଇଥିବା ଶକ୍ତିଶାଳୀ ବିସ୍ଫୋରଣ ପୂରା ଅଞ୍ଚଳକୁ ସ୍ତବ୍ଧ କରିଦେଇଛି । ଏହି ଭୟଙ୍କର ଅଘଟଣରେ ଅତିକମରେ ୨୧ ଜଣଙ୍କର ମୃତ୍ୟୁ ଘଟିଥିବା ବେଳେ ୬୧ରୁ ଅଧିକ ଲୋକ ଗୁରୁତର ଭାବେ ଆହତ ହୋଇଛନ୍ତି । ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ, କେଇ ମିନିଟ୍ ମଧ୍ୟରେ ଅନେକ ଏକର ପରିମିତ ଅଞ୍ଚଳ ପାଉଁଶ ହୋଇଯାଇଛି । ଚୀନର ସରକାରୀ ଟିଭି ଚ୍ୟାନେଲ 'ସିସିଟିଭି'ର ସୂଚନା ଅନୁଯାୟୀ, ହୁନାନ ପ୍ରାନ୍ତର ଲିୟୁୟାଙ୍ଗ ସହରରେ ଅବସ୍ଥିତ 'ଲିୟୁୟାଙ୍ଗ ହୁଆଶେଙ୍ଗ ଫାୟାରୱାର୍କସ ମାନୁଫାକଚରିଂ ଏଣ୍ଡ ଡିସପ୍ଲେ କମ୍ପାନୀ'ରେ ସୋମବାର ଅପରାହ୍ନ ପ୍ରାୟ ୪ଟା ୪୩ ମିନିଟ୍ ସମୟରେ ଏହି ବିସ୍ଫୋରଣ ଘଟିଥିଲା । ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳୁଛି ଯେ, ପାହାଡ଼ ଘେରା ଏକ ଗ୍ରାମୀଣ ଅଞ୍ଚଳ ହଠାତ୍ କମ୍ପି ଉଠିଥିଲା । ଆକାଶକୁ ଶହ ଶହ ଫୁଟ୍ ଉଚ୍ଚର କଳା ଧୂଆଁ ଉଠୁଥିବା ବେଳେ କ୍ରମାଗତ ଭାବେ ବଡ଼ ବଡ଼ ବିସ୍ଫୋରଣ ଶବ୍ଦ ଶୁଣିବାକୁ ମିଳିଥିଲା, ଯାହା ମିସାଇଲ୍ ଆକ୍ରମଣର ଭ୍ରମ ସୃଷ୍ଟି କରୁଥିଲା । ପାଉଁଶ ହୋଇଗଲା ଅଟ୍ଟାଳିକା, ଚାଲିଛି ଉଦ୍ଧାର କାର୍ଯ୍ୟ: ଡ୍ରୋନ ଜରିଆରେ ନିଆଯାଇଥିବା ଚିତ୍ରରୁ ଦେଖାଯାଇଛି ଯେ, ଯେଉଁଠାରେ କିଛି ସମୟ ପୂର୍ବରୁ ବଡ଼ ବଡ଼ ଅଟ୍ଟାଳିକା ଛିଡ଼ା ହୋଇଥିଲା, ସେଠାରେ ଏବେ କେବଳ ଜଳିଯାଇଥିବା ମଲବାର ସ୍ତୂପ ଦେଖିବାକୁ ମିଳୁଛି । ଅନେକ କୋଠାର ଛାତ ଉଡ଼ିଯାଇଥିବା ବେଳେ କିଛି ଘରର କେବଳ କାନ୍ଥ ରହିଛି । ଚୀନ ସରକାର ତୁରନ୍ତ ଘଟଣାସ୍ଥଳକୁ ୪୮୦ରୁ ଅଧିକ ଉଦ୍ଧାରକାରୀ ଦଳ ଏବଂ ବିଶେଷଜ୍ଞମାନଙ୍କୁ ପଠାଇଛନ୍ତି । ଖନନକାରୀ ଯନ୍ତ୍ର ସାହାଯ୍ୟରେ ମଲବା ତଳେ ଦବି ରହିଥିବା ଲୋକଙ୍କୁ ଖୋଜା ଚାଲିଛି । ଏହା ବି ପଢ଼ନ୍ତୁ...ଭୟଙ୍କର ଯୁଦ୍ଧ; ୟୁଏଇ ତୈଳ ପ୍ଲାଣ୍ଟ ଉପରେ ଇରାନର ଘନ ଘନ ମିସାଇଲ ମାଡ଼, ୩ ଭାରତୀୟ ଆହତ ବାଣ ଶିଳ୍ପର ପ୍ରମୁଖ କେନ୍ଦ୍ର ଲିୟୁୟାଙ୍ଗ: ସୂଚନାଯୋଗ୍ୟ ଯେ, ଲିୟୁୟାଙ୍ଗ ସହର ହେଉଛି ବିଶ୍ୱର ବାଣ ବଜାରର ଏକ ବଡ଼ କେନ୍ଦ୍ର। ଚୀନରେ ବ୍ୟବହୃତ ହେଉଥିବା ୬୦ ପ୍ରତିଶତ ଏବଂ ବିଦେଶକୁ ରପ୍ତାନି ହେଉଥିବା ୭୦ ପ୍ରତିଶତ ବାଣ କେବଳ ଏହି ଅଞ୍ଚଳରୁ ପ୍ରସ୍ତୁତ ହୋଇଥାଏ । ତେବେ ସୁରକ୍ଷା ନିୟମର ଅବହେଳା ଯୋଗୁଁ ଏଠାରେ ବାରମ୍ବାର ଏଭଳି ଦୁର୍ଘଟଣା ଘଟୁଛି । ନ୍ୟୁଜ୍ ଏଜେନ୍ସି AFPର ସୂଚନାନୁସାରେ, "ଚୀନର ଶିଳ୍ପ ସଂସ୍ଥାଗୁଡ଼ିକରେ ସୁରକ୍ଷା ନିୟମ କୋହଳ ଥିବାରୁ ଏଭଳି ବିସ୍ଫୋରଣ ସାଧାରଣ କଥା ହୋଇଗଲାଣି ।" ତେବେ ଏହା ପ୍ରଥମ ଘଟଣା ନୁହେଁ; ଗତବର୍ଷ ମଧ୍ୟ ହୁନାନ ପ୍ରାନ୍ତର ଏକ ବାଣ କାରଖାନାରେ ବିସ୍ଫୋରଣ ଘଟି ୯ ଜଣଙ୍କର ମୃତ୍ୟୁ ହୋଇଥିଲା । ସେହିପରି ୨୦୨୩ରେ ତିଆନଜିନ ସହରର କିଛି ଆବାସିକ ଅଞ୍ଚଳରେ ହୋଇଥିବା ବିସ୍ଫୋରଣରେ ୩ ଜଣ ପ୍ରାଣ ହରାଇଥିଲେ । ବର୍ତ୍ତମାନର ଏହି ବଡ଼ ଧରଣର ବିସ୍ଫୋରଣ ଚୀନର ଶିଳ୍ପ ସୁରକ୍ଷା ବ୍ୟବସ୍ଥା ଉପରେ ପୁଣି ଥରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି ।