ଛାତ୍ରଙ୍କ ଏକାଡେମିକ୍ ଯାତ୍ରା ମେଡ଼ିସିନରେ ଉଚ୍ଚ ଲକ୍ଷ୍ୟ

ବରଗଡ଼,୩ା୫(ପ୍ରେମାନନ୍ଦ ଖମାରୀ): ବିଦ୍ୟାଳୟରେ ପାଠପଢ଼ା ବ୍ୟତୀତ ଘରେ ଦୈନିକ ୬ରୁ ୭ଘଣ୍ଟା ପଢ଼ୁଥିଲି। ଟ୍ୟୁସର ପଢ଼ୁ ନ ଥିଲି। ପଦ୍ମପୁରସ୍ଥିତ ନାନା ମମତା(ବାପାଙ୍କ ଭଉଣୀ) ଘରେ ରହୁଛନ୍ତି ଏବଂ ନାନା ପଢ଼ାପଢ଼ିରେ ଗାଇଡ୍‌ କରୁଥିଲେ ବୋଲି ବରଗଡ଼ ଜିଲା ଟପ୍ପର ହୋଇଥିବା ପଦ୍ମପୁର ସରସ୍ବତୀ ଶିଶୁ ବିଦ୍ୟା ମନ୍ଦିର ଛାତ୍ରୀ ଦୀପଶିଖା ଗଡ଼ତିଆ କହିଛନ୍ତି। ସୋହେଲା ବ୍ଲକ ତାମିମୁଣ୍ଡା ଗ୍ରାମର ବାପା ଆଦିଦ୍ୟ ପ୍ରସାଦ ଓ ମା’ ଗିରିବାଳାଙ୍କ ଝିଅ ଦୀପଶିଖା ଭବିଷ୍ୟତରେ ଜଣେ ଡାକ୍ତର ହେବାକୁ ଲକ୍ଷ୍ୟ ରଖିଥିବା କହିଛନ୍ତି। ପରୀକ୍ଷାଫଳରେ ସେ ସନ୍ତୁଷ୍ଟ ଥିବାବେଳେ ଇଂରାଜୀ ଏବଂ ସାମାଜିକ ବିଜ୍ଞାନରେ ଆଉ କିଛି ଅଧିକ ମାର୍କ ମିଳିବ ବୋଲି ଆଶା ରଖିଥିଲେ ବୋଲି ଦୀପଶିଖା କହିଛନ୍ତି। ତାଙ୍କୁ ଇଂରାଜୀରେ ୯୦, ସାମାଜିକ ବିଜ୍ଞାନରେ ୯୦, ଗଣିତରେ୯୮, ବିଜ୍ଞାନରେ ୯୮, ସଂସ୍କୃତରେ ୧୦୦ ଏବଂ ମାତୃଭାଷା ଓଡ଼ିଆରେ ୯୭ ମାର୍କ ମିଳିଥିବା ସେ କହିଛନ୍ତି।