ଢେଙ୍କାନାଲ ଜିଲ୍ଲାରେ ବେଆଇନ ଇଟାଭାଟି ଭାଙ୍ଗିଲା

ପରଜଙ୍ଗ,୧୮ା୩(ନିଗମାନନ୍ଦ ଦଳବେହେରା): ଢେଙ୍କାନାଳ ଜିଲା ପରଜଙ୍ଗ ବ୍ଲକ ଡମୋଳ ଗ୍ରାମ ଝରାସାଇ ନିକଟରେ ହୋଇଥିବା ଏକ ବେଆଇନ ଇଟାଭାଟି ସହିତ ଗଢ଼ା ହୋଇଥିବା କିଛି ଇଟାକୁ ପ୍ରଶାସନ ତରଫରୁ ବୁଧବାର ମେଶିନ ସାହାଯ୍ୟରେ ଭାଙ୍ଗି ଦିଆଯାଇଛି। ଗ୍ରାମର ଭୁବନ ପରିଡ଼ାଙ୍କ ନିଆଁ ଲାଗିଥିବା ଏକ ଭାଟିକୁ ଭଙ୍ଗାଯାଇଛି। ଗ୍ରାମର ବିମଳ ନାୟକଙ୍କ ଅଭିଯୋଗ କ୍ରମେ ପଦୂଷଣ ବିଭାଗ ଏହାକୁ ଉଚ୍ଛେଦ କରିବା ପାଇଁ ଜିଲାପାଳଙ୍କୁ ଅବଗତ କରାଇଥିଲେ। ପରେ ଜିଲାପାଳଙ୍କ ନିର୍ଦ୍ଦେଶ କ୍ରମେ ପ୍ରଶାସନ ଏହି ନିଷ୍ପତ୍ତି ନେଇଥିବା କହିଛନ୍ତି। ଇଟାଭାଟି ଉଚ୍ଛେଦବେଳେ କାମାକ୍ଷାନଗର ଉପଜିଲାପାଳ ଦିନମଣି ନାୟକ, ତହସିଲଦାର ସୁଦେବ କୁମାର ପୃଷ୍ଟି, ଅତିରିକ୍ତ ତହସିଲଦାର ମନୋରଞ୍ଜନ ସାହୁ, ଜିଲା କନିଷ୍ଠ ଖଣି ଅଧିକାରୀ ସୁବାଶିଷ ପ୍ରଧାନ, ଅନୁଗୋଳ ପ୍ରଦୂଷଣ ବିଭାଗ ସହକାରୀ ପରିବେଶ ବୈଜ୍ଞାନିକ ସୌମ୍ୟରଞ୍ଜନ କଅଁର, ପ୍ରଫୁଲ କୁମାର ବେହେରା, ପରଜଙ୍ଗ ସହକାରୀ ଶ୍ରମ ଅଧିକାରୀ ବୈଜୟନ୍ତିବାଳା ମଲ୍ଲିକ, ଡିହଡୋଳ ଫରେଷ୍ଟର ଚନ୍ଦ୍ର ଶେଖର ବେହେରା, ସରାଙ୍ଗ ଫାଣ୍ଡି ଅଧିକାରୀ ସୌଭାଗ୍ୟ ପାଣି, ପରଜଙ୍ଗ ଥାନା ଏଏସ୍‌ଆଇ ଜଳନ୍ଧର ବାରିକ, ସରାଙ୍ଗ ରାଜସ୍ବ ନିରୀକ୍ଷକ କୃଷ୍ଣଚନ୍ଦ୍ର ବେହେରା ପ୍ରମୁଖ ଉପସ୍ଥିତ ଥିଲେ। ଏହି ବିଷୟରେ ଡମୋଳ ସରପଞ୍ଚ ସୁନିଲ କୁମାର ଧଳ କୁହନ୍ତି ରାଜନୈତିକ ଉଦ୍ଦେଶ୍ୟ ରଖି ଏହି ଇଟାଭାଟି ଭଙ୍ଗାଯାଉଛି ତଥାପି ଆମେ ସ୍ବାଗତ କରୁଛୁ। କିନ୍ତୁ ବ୍ଲକ ସାରା ଇଟାଭାଟି ହେଉଥିଲେ ସୁଦ୍ଧା ପ୍ରଶାସନ ଜାଣି ଶୁଣି କେମିତି ଗୋଟିଏ ଇଟାଭାଟି ଭାଙ୍ଗୁଛି ସମସ୍ତଙ୍କ ପାଇଁ ସମାନ ନିୟମ କରାଯାଇ ପଦକ୍ଷେପ ନେବାକୁ ଦାବି କରିଛନ୍ତି।