ଦଣ୍ଡା ଯାତ୍ରା ପର୍ବ ପଶ୍ଚିମ ଓଡ଼ିଶାର ବଲାଙ୍ଗିର ଜିଲ୍ଲାରେ ଭକ୍ତି ଏବଂ ଭାବପ୍ରବଣତା ଆଣିଥାଏ

ବଲାଙ୍ଗୀର,୧୯।୩ (ସୁନିଲ କୁମାର ମହାନ୍ତି): ଚୈତ୍ର ମାସରେ ଏବେ ଗାଁ ଗାଁରେ ଦେଖିବାକୁ ମିଳୁଛି ଦଣ୍ଡଯାତ୍ରା। ଦଣ୍ଡନାଚରେ ଦୁଲୁକୁଛି ଗାଁ ଦାଣ୍ଡ। ଧାର୍ମିକ ଆସ୍ଥା ଓ ମନୋରଞ୍ଜନର ଏହି ପାରମ୍ପରିକ ଯାତ୍ରା ଲୋକଙ୍କ ଭିତରେ ଭରି ଦେଇଛି ଭକ୍ତି ଓ ଭାବ ସମ୍ଭାର। ବଲାଙ୍ଗୀର ଜିଲା ସମେତ ପଶ୍ଚିମ ଓଡିଶାର ପୁରପଲ୍ଲୀରେ ଏବେ ଦଣ୍ଡ ଭୋକ୍ତା ମାନଙ୍କ ନିଷ୍ଠା, ସାଧନାର ଝଲକ ଦେଖିବାକୁ ମିଳୁଛି। ଛତର ବୈରଗ ଧରି ଦଣ୍ଡ ଭୋକ୍ତାମାନେ ଦେବାଧିଦେବ ମହାଦେବ ଓ ଦେବୀ ପାର୍ବତୀଙ୍କ ମହିମା ଗାନରେ ଗାଁ ଦାଣ୍ଡ, ପୁରପଲ୍ଲୀରେ ଧାର୍ମିକ ଆସ୍ଥା ଓ ବିଶ୍ୱାସର ପରିବେଶ ସୃଷ୍ଟି କରୁଛନ୍ତି। ବଲାଙ୍ଗୀର ଜିଲାର ତବଲବାଞ୍ଜି ଗାଁରେ ଦଣ୍ଡ ଭୋକ୍ତାମାନେ ଦଣ୍ଡର ପାରମ୍ପରିକ ପୂଜାବିଧି ଓ କଳା ନୈପୁଣ୍ୟତା ପ୍ରଦର୍ଶନ କରିଛନ୍ତି। ପରମ ଶ୍ରଦ୍ଧା ଓ ଭକ୍ତିରେ ଗାଁର ଶ୍ରଦ୍ଧାଳୁ ମାନେ ପୂଜାବିଧି କରିବା ସହ ଦଣ୍ଡର ଭୋକ୍ତା ଓ କଳାକାର ମାନଙ୍କୁ ସମ୍ମାନ ଜଣାଇଛନ୍ତି। ସନ୍ଧ୍ୟାରେ ଗାଁ ଦାଣ୍ଡରେ ଷୋହଳ ସୁଆଙ୍ଗ ଦଣ୍ଡର ଆସର ଜମୁଛି।