ପବିତ୍ର ରଥ ଶୋଭାଯାତ୍ରା ଶ୍ରୀ କ୍ଷେତ୍ର କୋରାପୁଟରେ ପହଞ୍ଚିଲା, ଆନନ୍ଦ ଏବଂ ଉତ୍ସବର ବାତାବରଣ ଆଣିଥାଏ

କୋରାପୁଟ, ୫।୫(ଅମିତାଭ ବେହେରା ): ସୋମବାର ଶ୍ରୀକ୍ଷେତ୍ର ପୁରୀରୁ ଆସିଥିବା ପବିତ୍ର ରଥ ଚକ କୋରାପୁଟର ଶାବର ଶ୍ରୀକ୍ଷେତ୍ରରେ ପହଞ୍ଚିବା ପରେ ଭକ୍ତମାନଙ୍କ ଦ୍ୱାରା ଭବ୍ୟ ସ୍ବାଗତ କରାଯାଇଛି। ଗୁଣ୍ଡିଚା ମନ୍ଦିର ନିକଟରୁ ଆରମ୍ଭ ହୋଇଥିବା ଏହି ଶୋଭାଯାତ୍ରା ଭକ୍ତିମୟ ପରିବେଶ ମଧ୍ୟରେ ମନ୍ଦିର ପର୍ଯ୍ୟନ୍ତ ନିଆଯାଇଥିଲା। ଭକ୍ତମାନଙ୍କର ଭିଡ଼ , ଭଜନ-କୀର୍ତ୍ତନ ଏବଂ ଧାର୍ମିକ ଉତ୍ସାହରେ ସମଗ୍ର ପରିବେଶ ଉତ୍ସବମୟ ହୋଇଯାଇଥିଲା। ଆଗରୁ ପୁରୀରୁ ଜଗନ୍ନାଥ ଓ ସୁଭଦ୍ରାଙ୍କ ରଥ ଚକ ଆସିଥିବା ବେଳେ ସୋମବାର ବଳଭଦ୍ରଙ୍କ ରଥ ଚକ ଆସି ପହଞ୍ଚିଛି। କୋରାପୁଟ ଶାବର ଶ୍ରୀକ୍ଷେତ୍ର ବାସୀଙ୍କ ବହୁ ଦିନର ଆଶା ରହିଥିଲା ପୁରୀ ଶ୍ରୀକ୍ଷେତ୍ରର ୩ ରଥ ଚକ କୋରାପୁଟ ଶାବର ଶ୍ରୀକ୍ଷେତ୍ରରେ ସ୍ଥାପନ କରିବା ପାଇଁ , ଆଜି ସେମାନଙ୍କ ଆଶା ପୂରଣ ହୋଇଛି। ଯେଉଁମାନେ ପୁରୀ ଯାଇ ପାରୁନାହାନ୍ତି ସେମାନେ ଶାବର ଶ୍ରୀକ୍ଷେତ୍ରରେ ରଥ ଚକକୁ ଦର୍ଶନ କରି ସୌଭାଗ୍ୟ ଲାଭ କରିପାରିବେ ବୋଲି ମନ୍ଦିର ପ୍ରଶାସନ ତରଫରୁ କୁହାଯାଇଛି। ଏହି କାର୍ଯ୍ୟକ୍ରମରେ କୋରାପୁଟ ବିଧାୟକ ରଘୁରାମ ମାଛ, ପୌର ପରିଷଦର ଅଧ୍ୟକ୍ଷ ଲଲାଟ ରଞ୍ଜନ ସେଠି, ମନ୍ଦିର ଭାରପ୍ରାପ୍ତ ସମ୍ପାଦକ ଭବାନୀ ଆଚାର୍ଯ୍ୟଙ୍କ ସମେତ ମନ୍ଦିର ପରିଚାଳନା କମିଟି ସଦସ୍ୟ , କୋରାପୁଟ ସହରବାସୀଙ୍କ ସହ ଶତାଧିକ ଭକ୍ତ ଉପସ୍ଥିତ ଥିଲେ।