ପ୍ରବଳ ଉତ୍ତାପ ମଧ୍ୟରେ ପାଣି ଅଭାବକୁ ନେଇ ଓଡ଼ିଶା ପଣ୍ୟାଗାର କର୍ମଚାରୀଙ୍କ ବିକ୍ଷୋଭ

ମହାକାଳପଡ଼ା, ୫ା୫(ପ୍ରତାପ ଚନ୍ଦ୍ର ସ୍ବାଇଁ):ମହାକାଳପଡ଼ା ବ୍ଲକ ଯଦୁପୁର ପଞ୍ଚାୟତ ୫୩ ନଂ. ଜାତୀୟ ରାଜପଥ ମଶାକଣି ବଡଦଣ୍ଡାଠାରେ କେନ୍ଦ୍ରୀୟ ପଣ୍ୟାଗାର ନିଗମ ଗୋଦାମ ଗୃହ ରହିଛି। ଏହି ଗୋଦାମ ଗୃହରେ ଶହେରୁ ଅଧିକ ଦୈନିକ ଗାଡ଼ି ଚାଳକ, ହେଲ୍ପର୍‌ ଓ ଶ୍ରମିକ ଖରା ହେଉ କି ବର୍ଷା ଖାତିର ନ କରି ପଣ୍ୟ ଦ୍ରବ୍ୟଗୁଡ଼ିକ ଗାଡିରୁ ଲୋଡ ଅନଲୋଡ଼ କରିଥାନ୍ତି। ହେଲେ ଏମାନଙ୍କୁ ପିଇବା ପାଣି ସମସ୍ୟା ଦେଖାଦେଇଛି। ପାଣି ମୁନ୍ଦେ ପାଇଁ ଜିଲାଠାରୁ ବିଭାଗୀୟ ଉଚ୍ଚ ଅଧିକାରୀଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ କିଛି ସମସ୍ୟା ସୁଧୁରୁନି ବୋଲି ଶ୍ରମିକମାନେ ଅଭିଯୋଗ କରି ସୋମବାର ଧାରଣା ଦେଇଥିଲେ। ଗୋଦାମ ଗୃହ ପରିଚାଳକ ଶ୍ୟାମ ମଣ୍ଡଳ, ମିଲ ସଂଘ ସଭାପତି ଧ୍ରୁବ ସାହୁ , ଶ୍ରମିକ ସଂଘ ସଭାପତି ଦିଗନ୍ତ ସାମନ୍ତରାୟଙ୍କ ଅନ୍ୟ ଶ୍ରମିକ ଓ କର୍ମଚାରମାନେ ପାଣି ମିଳୁ ନ ଥିବା ଅଭିଯୋଗ କରିଛନ୍ତି। ତୁରନ୍ତ ଏହି ଗୋଦାମ ଗୃହ ଶ୍ରମିକ କର୍ମଚାରୀଙ୍କୁ ପିଇବା ପାଣି ଯୋଗାଇ ଦେବା ପାଇଁ ବିଭିନ୍ନ ମହଲରେ ଦାବୀ କରିଛନ୍ତି।