ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଐତିହାସିକ ବିଜୟ ପରେ ବିଜେପି ସରକାର ଗଠନ କରିବ।

କୋଲକାତା, ୫।୫: ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ର ଫଳାଫଳ ପ୍ରକାଶ ପାଇସାରିଛି । ରାଜ୍ୟରେ ଭାରତୀୟ ଜନତା ପାର୍ଟି (BJP) ଏକ ଐତିହାସିକ ବିଜୟ ହାସଲ କରି ସରକାର ଗଠନ କରିବାକୁ ଯାଉଥିବା ବେଳେ ଏବେ ବି ଗୋଟିଏ ସିଟ୍‌କୁ ନେଇ ସସପେନ୍ସ ଜାରି ରହିଛି । ଗତ ୨୪ ଘଣ୍ଟା ଧରି ଗଣତି ଚାଲିଥିଲେ ମଧ୍ୟ ରାଜାରହାଟ୍ ନ୍ୟୁ ଟାଉନ ଆସନର ଚୂଡ଼ାନ୍ତ ଫଳାଫଳ ଏପର୍ଯ୍ୟନ୍ତ ସାମ୍ନାକୁ ଆସିନାହିଁ । ପଶ୍ଚିମବଙ୍ଗର ଅନ୍ୟ ସମସ୍ତ ଆସନର ଚିତ୍ର ସ୍ପଷ୍ଟ ହୋଇସାରିଥିବା ବେଳେ ରାଜାରହାଟ୍ ନ୍ୟୁ ଟାଉନ ସିଟ୍ରେ ଭୋଟ ଗଣତି ଶେଷ ହେବାର ନାଁ ନେଉନାହିଁ । ରାତି ସାରା ଗଣତି ଚାଲିବା ପରେ ମଧ୍ୟ ବିଜେପି ଏବଂ ଟିଏମସି ମଧ୍ୟରେ କଡ଼ା ସଂଘର୍ଷ ଦେଖିବାକୁ ମିଳୁଛି । ୧୭ ରାଉଣ୍ଡ ଶେଷ: ଏପର୍ଯ୍ୟନ୍ତ ୧୭ ରାଉଣ୍ଡ ଗଣତି ଶେଷ ହୋଇସାରିଛି ଏବଂ ଆଉ ମାତ୍ର ଗୋଟିଏ ରାଉଣ୍ଡ ବାକି ଅଛି । ମାର୍ଜିନ ମାତ୍ର ୩୨୩: ଟିଏମସି ପ୍ରାର୍ଥୀ ତପଶ ଚାଟାର୍ଜୀ ବର୍ତ୍ତମାନ ସୁଦ୍ଧା ଆଗୁଆ ଅଛନ୍ତି, କିନ୍ତୁ ବିଜେପି ପ୍ରାର୍ଥୀଙ୍କ ସହ ତାଙ୍କର ବ୍ୟବଧାନ ମାତ୍ର ୩୨୩ ଭୋଟ୍ । ଯେକୌଣସି ମୁହୂର୍ତ୍ତରେ ଏହି ଫଳାଫଳ ଓଲଟପାଲଟ ହୋଇପାରେ । ବଙ୍ଗଳାରେ ବିଜେପିର ‘ସୁନାମି’, ଧରାଶାୟୀ ଟିଏମସି: ୨୦୨୬ ନିର୍ବାଚନ ବଙ୍ଗଳା ରାଜନୀତିରେ ଏକ ବଡ଼ ପରିବର୍ତ୍ତନ ଆଣିଛି । ୨୯୪ ଆସନ ବିଶିଷ୍ଟ ବିଧାନସଭାରେ ବିଜେପି ପ୍ରଥମ ଥର ପାଇଁ ପୂର୍ଣ୍ଣ ବହୁମତ ସହ ସରକାର ଗଢ଼ିବାକୁ ଯାଉଛି । ବିଜେପି ଏକାକୀ ୨୦୬ଟି ଆସନରେ ବିଜୟୀ ହୋଇଛି । ୨୦୨୧ରେ ୨୧୫ ଆସନ ଜିତିଥିବା ମମତା ବାନାର୍ଜୀଙ୍କ ଟିଏମସି ଚଳିତ ଥର ମାତ୍ର ୮୦ଟି ଆସନରେ ସିମିତ ହୋଇଯାଇଛି । ନିଜ ଗଡ଼ରେ ହାରିଲେ ମମତା: ଏହି ନିର୍ବାଚନର ସବୁଠାରୁ ବଡ଼ ଖବର ହେଉଛି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପରାଜୟ । ନିଜର ପାରମ୍ପରିକ ଗଡ଼ ଭବାନୀପୁର ଆସନରୁ ମମତା ବାନାର୍ଜୀ ପରାଜିତ ହୋଇଛନ୍ତି । ବିଜେପିର ଶୁଭେନ୍ଦୁ ଅଧିକାରୀ ତାଙ୍କୁ ୧୫,୧୦୫ ଭୋଟ୍ରେ ହରାଇଛନ୍ତି । ଶୁଭେନ୍ଦୁଙ୍କୁ ୭୩,୯୧୭ ଭୋଟ୍ ମିଳିଥିବା ବେଳେ ମମତାଙ୍କୁ ୫୮,୮୧୨ ଭୋଟ୍ ମିଳିଛି । ୧୫ ବର୍ଷର ଶାସନର ଅନ୍ତ: ୨୦୧୧ ମସିହାରେ ବାମପନ୍ଥୀ ସରକାରକୁ ହଟାଇ ମମତା ବାନାର୍ଜୀ ସତ୍ତାକୁ ଆସିଥିଲେ । କ୍ରମାଗତ ୧୫ ବର୍ଷ ଧରି ସେ ପଶ୍ଚିମବଙ୍ଗର ଶାସନ ଗାଦିରେ ବସିଥିଲେ । କିନ୍ତୁ, ୨୦୨୬ରେ ଜନତା ‘ପରିବର୍ତ୍ତନ’ ସପକ୍ଷରେ ମତ ଦେଇଛନ୍ତି । ୨୦୨୧ରେ ବିଜେପି ମାତ୍ର ୭୭ଟି ଆସନ ପାଇଥିବା ବେଳେ ମାତ୍ର ୫ ବର୍ଷ ମଧ୍ୟରେ ଏହି ସଂଖ୍ୟାକୁ ୨୦୦ ପାର୍ କରାଇବାରେ ସଫଳ ହୋଇଛି । “ଗଙ୍ଗୋତ୍ରୀରୁ ଗଙ୍ଗାସାଗର ଯାଏଁ କେବଳ ପଦ୍ମ” – ପିଏମ ମୋଦୀ ବଙ୍ଗଳାରେ ବିଜେପିର ଏହି ବିରାଟ ବିଜୟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅତ୍ୟନ୍ତ ଉତ୍ସାହିତ ଅଛନ୍ତି । ନିର୍ବାଚନ ଫଳାଫଳ ପରେ ଜନତାଙ୍କୁ ସମ୍ବୋଧିତ କରି ସେ କହିଛନ୍ତି, "ବଙ୍ଗଳାରେ ପ୍ରତିଶୋଧ ନୁହେଁ, ବରଂ ପରିବର୍ତ୍ତନ ହେବା ଉଚିତ୍ । ଭୟ ନୁହେଁ, ଭବିଷ୍ୟତର କଥା ହେବା ଉଚିତ୍।" ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ବଙ୍ଗଳାରେ ହିଂସାର ଚକ୍ର ଶେଷ ହେବା ଦରକାର । ବିହାର ନିର୍ବାଚନ ସମୟର ଏକ ପୁରୁଣା କଥାକୁ ମନେ ପକାଇ ସେ କହିଛନ୍ତି ଯେ ଗଙ୍ଗା ନଦୀ ବିହାର ଦେଇ ଗଙ୍ଗାସାଗର ପର୍ଯ୍ୟନ୍ତ ଯାଏ । ଆଜି ଗଙ୍ଗୋତ୍ରୀରୁ ନେଇ ଗଙ୍ଗାସାଗର ପର୍ଯ୍ୟନ୍ତ ସବୁଠି କେବଳ ପଦ୍ମ ହିଁ ପଦ୍ମ ଫୁଟିଛି । ଏହି ବିଜୟ ବଙ୍ଗଳାର ଜନସାଧାରଣଙ୍କ ବିଜୟ ବୋଲି ସେ ଅଭିହିତ କରିଛ । ରାଜାରହାଟ୍ ନ୍ୟୁ ଟାଉନର ଶେଷ ରାଉଣ୍ଡ ଗଣତି ଶେଷ ହେବା ପରେ ରାଜ୍ୟର ସମ୍ପୂର୍ଣ୍ଣ ଫଳାଫଳ ଆଧିକାରିକ ଭାବେ ଘୋଷଣା କରାଯିବ । ଆହୁରି ପଢ଼ନ୍ତୁ...West Bengal CM Race : ଦିଦି ଗଲେ ଫୁଟିଲା ପଦ୍ମ; ଏବେ ବଙ୍ଗ ଗାଦିରେ କିଏ ବସିବ ? ମୁଖ୍ୟମନ୍ତ୍ରୀ ରେସ୍ରେ ୬ ବଡ଼ ନାମ