ବିଜେପିର ଭୂସ୍ଖଳନ ବିଜୟ ବର୍ଷ ବର୍ଷ ଧରି ବନ୍ଦ ରହିବା ପରେ ଆସନସୋଲରେ ପୁନର୍ବାର ଖୋଲିଲା ଦୁର୍ଗା ମନ୍ଦିର

କୋଲକାତା, ୫।୫: ବଙ୍ଗରେ ବିଜେପିର ବଡ଼ ବିଜୟ, ଖୋଲିଲା ବର୍ଷ ବର୍ଷ ଧରି ବନ୍ଦ ଥିବା ଦୁର୍ଗା ମନ୍ଦିର ! ପଶ୍ଚିମବଙ୍ଗ ରାଜନୀତିରେ ଏବେ ଏକ ବଡ଼ ପରିବର୍ତ୍ତନର ଲହରି ଦେଖିବାକୁ ମିଳିଛି । ୧୫ ବର୍ଷର ମମତା ଶାସନର ଅନ୍ତ ଘଟାଇ ବିଜେପି ବଙ୍ଗ ଦଖଲ କରିବା ପରେ ଏହାର ପ୍ରଭାବ ଏବେ ଗ୍ରାଉଣ୍ଡ ଜିରୋରେ ଦେଖିବାକୁ ମିଳୁଛି । ଆସାନସୋଲରୁ ଆସିଛି ଏକ ବଡ଼ ଖବର, ଯେଉଁଠାରେ ବର୍ଷ ବର୍ଷ ଧରି ତାଲା ପଡ଼ିଥିବା ମନ୍ଦିରରୁ ଶୁଭିଛି ଶଙ୍ଖ ନାଦ । କାହିଁକି ବନ୍ଦ ଥିଲା ଏହି ମନ୍ଦିର ଏବଂ ବିଜେପି ଜିତିବା ପରେ କିଭଳି ବଦଳିଗଲା ଚିତ୍ର ? ଆସନ୍ତୁ ଜାଣିବା । ଆସାନସୋ ଶ୍ରୀ ଶ୍ରୀ ଦୁର୍ଗାମାତା ଚାରିଟେବୁଲ୍ ଟ୍ରଷ୍ଟ ଦ୍ୱାରା ପରିଚାଳିତ ଏହି ପ୍ରସିଦ୍ଧ ଦୁର୍ଗା ମନ୍ଦିର । ସ୍ଥାନୀୟ ବିବାଦ ଏବଂ ପ୍ରଶାସନିକ କଟକଣା ଯୋଗୁଁ ଏହି ମନ୍ଦିର ଦୀର୍ଘ ବର୍ଷ ଧରି ଭକ୍ତଙ୍କ ପାଇଁ ବନ୍ଦ ରହିଥିଲା । କେବଳ ଦୁର୍ଗା ପୂଜା କିମ୍ବା ଲକ୍ଷ୍ମୀ ପୂଜା ସମୟରେ ହିଁ ମନ୍ଦିରର କବାଟ ଖୋଲୁଥିଲା । କିନ୍ତୁ, ସୋମବାର ଏକ ନୂଆ ଇତିହାସ ସୃଷ୍ଟି ହୋଇଛି । ଏହି ମନ୍ଦିରରେ ପଡ଼ୁରହୁଥିବା ତାଲା ଭାଙ୍ଗିଛି ଏବଂ ଭକ୍ତମାନେ ମା’ଙ୍କ ଦର୍ଶନ ପାଇଁ ମନ୍ଦିର ଭିତରକୁ ପ୍ରବେଶ କରିଛନ୍ତି । ଏହି ମନ୍ଦିର ଖୋଲିବା ପଛରେ ରହିଛି ବିଜେପିର ବିପୁଳ ବିଜୟ । ପଶ୍ଚିମ ବର୍ଦ୍ଧମାନ ଜିଲ୍ଲାର ସମସ୍ତ ୯ଟି ଯାକ ଆସନ ବିଜେପି ଖାତାକୁ ଯାଇଛି । ନିର୍ବାଚନ ଜିତିବା ପରେ ପ୍ରତିଶ୍ରୁତି ରଖିଲେ କୃଷ୍ଣେନ୍ଦୁ ମୁଖାର୍ଜୀ । ଆସାନସୋଲ୍ ଉତ୍ତରର ନବନିର୍ବାଚିତ ବିଜେପି ବିଧାୟକ କୃଷ୍ଣେନ୍ଦୁ ମୁଖାର୍ଜୀ ନିର୍ବାଚନ ପୂର୍ବରୁ ପ୍ରତିଶ୍ରୁତି ଦେଇଥିଲେ ଯେ, ଯଦି ସେ ଜିତନ୍ତି ତେବେ ମନ୍ଦିରକୁ ସବୁଦିନ ପାଇଁ ଖୋଲାଯିବ । ଜିତିବା ପରେ ସେ ନିଜେ ମନ୍ଦିରକୁ ଯାଇ କବାଟ ଖୋଲିବା ସହ ପୂଜାର୍ଚ୍ଚନାରେ ସାମିଲ ହୋଇଥିଲେ । କେବଳ ଏହି ମନ୍ଦିର ନୁହେଁ, ସାରା ପଶ୍ଚିମବଙ୍ଗର ରାଜନୈତିକ ସମୀକରଣ ଏବେ ବଦଳି ଯାଇଛି । ବଙ୍ଗରେ ବିଜେପିର ବଡ଼ ବିଜୟ ହୋଇଛି । ୨୯୩ଟି ଆସନ ମଧ୍ୟରୁ ବିଜେପି ୨୦୬ଟି ଆସନ ଜିତି ବହୁମତ ହାସଲ କରିଛି । ଅନ୍ୟପଟେ ୧୫ ବର୍ଷ ଧରି ପଶ୍ଚିମବଙ୍ଗରେ ଶାସନ କରୁଥିବା ଟିଏମସିର ପରାଜୟ ହୋଇଛି । ମମତା ବାନାର୍ଜୀଙ୍କ ଟିଏମସି ମାତ୍ର ୮୦ଟି ଆସନରେ ସୀମିତ ରହିଛି । ଚଳିତ ନିର୍ବାଚନରେ ୯୨ ପ୍ରତିଶତରୁ ଅଧିକ ମତଦାନ ହୋଇଥିଲା, ଯାହା ସ୍ପଷ୍ଟ ସୂଚାଉଥିଲା ଯେ ଜନତା ଏକ ବଡ଼ ପରିବର୍ତ୍ତନ ଚାହୁଁଛନ୍ତି । ଆସାନସୋଲର ଏହି ଦୁର୍ଗା ମନ୍ଦିର ଖୋଲିବା ଘଟଣା ଏବେ ବଙ୍ଗରେ ବିଜେପିର ସଫଳତା ଏବଂ ରାଜନୈତିକ ପରିବର୍ତ୍ତନର ପ୍ରତୀକ ପାଲଟିଛି । ଲୋକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳୁଥିବା ବେଳେ ଆଗାମୀ ଦିନରେ ବିଜେପି ସରକାର କିଭଳି କାମ କରୁଛନ୍ତି, ତାହା ଉପରେ ସମସ୍ତଙ୍କ ନଜର ରହିବ । ଆହୁରି ପଢ଼ନ୍ତୁ...Bengal New CM: କିଏ ଧରିବ ବଙ୍ଗ ମଙ୍ଗ ? ଆସିଲା ବଡ଼ ଖବର, ୯ରେ ଶପଥ ଗ୍ରହଣ ଉତ୍ସବ