ସହରାଞ୍ଚଳରେ ନୂତନ ମା'ମାନଙ୍କ କ୍ଷେତ୍ରରେ ପ୍ରସବ ପରବର୍ତ୍ତୀ ଅବସାଦ 12.1% କୁ ପ୍ରଭାବିତ କରିଥାଏ ସର୍ଭେ

ଭୁବନେଶ୍ୱର ୦୫/୦୫:‘ମାତୃତ୍ୱ’ ଜଣେ ମହିଳାଙ୍କୁ ପୂର୍ଣ୍ଣତା ଆଣି ଦେଇଥାଏ ସତ । କିନ୍ତୁ ମାତୃତ୍ୱ ପାଇଁ ଜଣେ ମହିଳାଙ୍କୁ ଅନେକ କିଛି ସହ୍ୟ କରିବାକୁ ପଡ଼ିଥାଏ । ଗର୍ଭଧାରଣ ଓ ପ୍ରସବ ଯନ୍ତ୍ରଣାଠାରୁ ବଳିପଡ଼େ ପ୍ରସବ ପରବର୍ତ୍ତୀ ଶାରୀରିକ, ମାନସିକ ଏବଂ ଭାବନାତ୍ମକ ସ୍ଥିତି । ଅଧିକାଂଶ ମହିଳା ପ୍ରସବ ପରେ ପରେ ଅବସାଦ ବା ଡିପ୍ରେସନର ଶିକାର ହୋଇଥାନ୍ତି । ତେବେ ଏହି ପ୍ରସବ ପରବର୍ତ୍ତୀ ଅବସାଦ ରୋକିବା ଲାଗି ସ୍ତନ୍ୟପାନ କରାଇବା ଜରୁରୀ । ଅସ୍ତ୍ରୋପଚାର ପ୍ରସବ ଏବଂ କମ୍ ସ୍ତନ୍ୟପାନ ଅବଧି ପ୍ରସବ ପରେ ଅବସାଦର ଅନ୍ୟତମ ପ୍ରମୁଖ କାରଣ ହୋଇପାରେ । ଏହା ପ୍ରସବ ପରବର୍ତ୍ତୀ ଅବସାଦ ଆଣିବାର ୪ ଗୁଣା ସମ୍ଭାବନା ସୃଷ୍ଟି କରେ ବୋଲି ଏକ ସଦ୍ୟତମ ସର୍ଭେ ରିପୋର୍ଟରୁ ପ୍ରକାଶ । ସହରାଞ୍ଚଳରେ ନୂଆ ନୂଆ ମା’ ହୋଇଥିବା ୧୦୭ ଜଣ ମହିଳାଙ୍କୁ ନେଇ ଏହି ସର୍ଭେ ହୋଇଥିଲା । ସେମାନଙ୍କ ମଧ୍ୟରୁ ୧୨.୧ ପ୍ରତିଶତ ମା’ଙ୍କଠାରେ ପ୍ରସବ ପରବର୍ତ୍ତୀ ଅବସାଦର ଲକ୍ଷଣ ଦେଖିବାକୁ ମିଳିଛି । ଏଭଳି ସ୍ଥିତିରେ ମା’ମାନେ ଲଗାତାର ମନଦୁଃଖ, ଏକଲାପଣ, ଅନିଦ୍ରାର ଶିକାର ହେବାସହ ଶିଶୁ ସହ ନିବିଡ଼ ହେଲା ବେଳେ ଅସହଜ ଅନୁଭବ କରିଥାନ୍ତି । ଭୁବନେଶ୍ୱରରେ ପ୍ରାୟ ୮ ଜଣ ମା’ଙ୍କ ମଧ୍ୟରୁ ଜଣେ ମହିଳା ପ୍ରସବ ପରବର୍ତ୍ତୀ ଅବସାଦରେ ଶିକାର ହେଉଥିବା ଜଣାପଡ଼ିଛି । ଏହା ରାଜ୍ୟ ତଥା ଦେଶର ଅନ୍ୟ ଅଞ୍ଚଳରେ ହୋଇଥିବା ସର୍ଭେ ତଥ୍ୟ ସହ ପ୍ରାୟତଃ ସମାନ ବୋଲି ରିପୋର୍ଟରେ ଦର୍ଶାଯାଇଛି । ​​​​​​​ କ୍ଲିନିକାଲ ଏପିଡେମିଓଲୋଜି ଆଣ୍ଡ ଗ୍ଲୋବାଲ ହେଲ୍‌ଥ ଜର୍ଣ୍ଣାଲର ମାର୍ଚ୍ଚ-ଏପ୍ରିଲ ସଂସ୍କରଣରେ ପ୍ରକାଶିତ ଏହି ସର୍ଭେ ରିପୋର୍ଟରେ ପ୍ରସବର ପ୍ରକାର ଏବଂ ସ୍ତନ୍ୟପାନ ଅବଧି ମା’ର ପ୍ରସବ ପରବର୍ତ୍ତୀ ଅବସାଦ ସହିତ ଜଡ଼ିତ ବୋଲି କୁହାଯାଇଛି । ସର୍ଭେ ସମୟରେ ଯେଉଁ ମା’ମାନେ ୨୪ ମାସ ପର୍ଯ୍ୟନ୍ତ ସ୍ତନ୍ୟପାନ କରାଇଥିଲେ, ସେମାନଙ୍କ ତୁଳନାରେ ୧୨ ମାସ ବା ତା’ଠାରୁ କମ୍ ସମୟ ସ୍ତନ୍ୟପାନ କରାଇଥିବା ମା’ଙ୍କ କ୍ଷେତ୍ରରେ ଅବସାଦର ସମ୍ଭାବନା ୫ ଗୁଣ ଅଧିକ ଥିଲା । ସେହିପରି ୧୨ରୁ ୨୪ ମାସ ଯାଏ ସ୍ତନ୍ୟପାନ କରାଇଥିବା ମା’ଙ୍କ କ୍ଷେତ୍ରରେ ଅବସାଦ ସମ୍ଭାବନା କମ୍ ରହିଥିଲା । ଅର୍ଥାତ୍ କମ୍ ସମୟ ପାଇଁ ସ୍ତନ୍ୟପାନ ନିଷ୍ପତ୍ତି ମା’ର ମାନସିକ ଅବସାଦର ଅନ୍ୟତମ ପ୍ରମୁଖ କାରଣ ବୋଲି ସର୍ଭେରେ ଜଣାପଡ଼ିଛି । ଦୀର୍ଘ ସମୟ ଧରି ସ୍ତନ୍ୟପାନ କରାଇବା ଦ୍ୱାରା ମା’ ଓ ଶିଶୁ ମଧ୍ୟରେ ନିବିଡ଼ତା ବଢ଼ିବା ସହ ମାନସିକ ଦୁଶ୍ଚିନ୍ତା ହ୍ରାସ ପାଏ । ଏଣୁ ନବଜାତ ସହ ମା’ମାନଙ୍କୁ ମଧ୍ୟ ଆବେଗିକ, ବ୍ୟବହାରିକ ସହଯୋଗ ସହ ସ୍ନେହ, ମମତା ଜରୁରୀ । ଆହୁରି ପଢ଼ନ୍ତୁ...ମଣିଷଙ୍କ ଭଳି ପ୍ରାଣୀଧନଙ୍କୁ ବି ମିଳିବ ହୋମିଓପାଥି ଚିକିତ୍ସା,ଓୟୁଏଟି-ସିସିଆରଏଚ୍ ପ୍ରୟାସରେ ୩ ଗବେଷଣାକୁ ଅନୁମତି